އަދުގެ ސަރުކާރުން ރައްޔިތުންނަށް އަނިޔާ ނުކުރާނެ ކަމަށާއި ނަމަވެސް ޤާނޫނު ތަންފީޒުކުރުމުގައި ފަހަތަކަށް ނުޖެހޭނެ ކަމަށް މިނިސްޓަރ އޮފް ހޯމް އެފެއާޒް އައްޝައިޚް އިމްރާން އަބްދުލްﷲ ވިދާޅުވެއްޖެ އެވެ.
މިރޭ ހޯމް މިނިސްޓަރ ކުރެއްވި ޓުވީޓެއްގައި މިހެން ވިދާޅުވެފައި ވާއިރު މިއަދު މާލޭގައި ގިނަ ބަޔަކު ވަނީ މޯލްޑިވިއަން ޑިމޮކްރެޓިކް ނެޓްވޯކް(އެމްޑީއެން) އިން އިސްލާމް ދީނަށާއި ކީރިތި ރަސޫލާއަށް ފުރައްސާރަކޮށް ރިޕޯޓު ނެރެފައިވާތީ އެކަން ކުއްވެރިކޮށް އެމްޑީއެން އުވާލުމަށް އަޑުއުފުލާފައެވެ.
އެމްޑީއެންގެ އެ އަމަލު ކުއްވެރިކޮށް ރާއްޖޭގެ އެތައް ހާސް ރައްޔިތުން އަޑުއުފުލާފައިވީރުވެސް ސަރުކާރުން އެމްޑީއެން ސަސްޕެންޑް ކުރުން ނޫން އިތުރު ފިޔަވަޅެއް އަޅާފައެއް ނުވެއެވެ. މި ސަބަބާއި ހުރެ ސަރުކާރަށް ތާއީދުކުރާ ގިނަ ފަރާތްތަކުން ދަނީ ސަރުކާރަށް ފާޑުކިޔައި އެކި ޕްލެޓްފޯމް ތަކުގައި އަޑުއުފުލާފައެވެ.
