ކުރީގެ ސަރުކާރުތަކުން އުސޫލުތަކުގެ ބޭރުން ބާތިލްކޮށްފައިވާ އެއްބަސްވުންތަކަށް ދައުލަތުން މާލީ ބޮޑެތި ބަދަލުތަކެއް ދެމުންދާ ގޮތް އެންޓި ކޮރަޕްޝަން ކޮމިޝަން (އޭސީސީ) އިން ބަލަން ފަށައިފި އެވެ.
އަލަށް އައްޔަން ކުރި އޭސީސީގެ މެމްބަރުން މިއަދު ބޭއްވި ބައްދަލުވުމުގައި ވިދާޅުވީ، ސަރުކާރުން އަމިއްލަ ކުންފުނިތަކަށް ބަދަލުދިނުމާ ގުޅޭ ޝަކުވާއެއް އެ ކޮމިޝަނަށް ހުށަހެޅިފައިވާ ކަމަށެވެ. އަދި އެކަމާ ގުޅިގެން އެ މައްސަލަ ބަލަމުން އަންނަ ކަމަށް ކޮމިޝަނުން ވަނީ ބުނެފައެވެ.
އެ ކޮމިޝަންގެ މެމްބަރު އިބްރާހިމް ޝަކީލް ވިދާޅުވީ މިހާތަނަށް ބަދަލު ދީފައި ވަނީ ނުވަތަ ބަދަލުގެ ގޮތުގައި ދޭން އެއްބަސްވެފައި ވަނީ ބޮޑެތި އަދަދުތަކެއް ކަމުގެ ޝަކުވާ ކުރަމުން ދިއުމާ ގުޅިގެން ކޮންމެ ސެޓްލްމެންޓެއް ވެސް ވަކިވަކިން ބަލަން ކޮމިޝަނުން ނިންމާފައިވާ ކަމަށެވެ. މެމްބަރުން އިސް ނަގައިގެން އެ މައްސަލަ ބަލަމުން އަންނަ އިރު މި ސަރުކާރު އައިފަހުން އަމިއްލަ ކުންފުނިތަކަށް ވަނީ ބަދަލުގެ ގޮތުގައި ބިލިއަނެއްހާ ރުފިޔާ ދޫކޮށްފަ އެވެ.
މި ސަރުކާރު ވެރިކަމަށް އައި ފަހުން ބޮޑެތި އަދަދުތަކުން ބަދަލުދީފައިވާ ކުންފުނިތަކުގެ ތެރޭގައި ޑޮލަރާއިބޯޑާ ކޮންޓްރޯލް ސިސްޓަމެއް ގާއިމްކުރަން ވީ އެއްބަސްވުން އުވާލުމުން މެލޭޝިއާގެ ނެކްސްބިޒަށް ދިވެހި ސަރުކާރުން ދެއްކި 18.1 މިލިއަން ޑޮލަރު (280 މިލިއަަން ރުފިޔާ) ، ހައުސިން ޔުނިޓްތައް އަޅަން ހަވާލުކުރި ނޫމަޑި އެއްބަސްވުން އުވާލައިގެން 55 މިލިއަން ޑޮލަރު، ވިލާ ގުރޫޕްގެ ހިއްސާ އޮންނަ ވޯލްޑް ލިންކް ޓްރެވަލްސް (ޑަބްލިއުއެލްޓީ) އަށް ދައުލަތުން ދައްކަންޖެހޭ 5.6 މިލިއަން ޑޮލަރު (130 މިލިއަން ރުފިޔާ) ހިމެނެއެވެ. މީގެ އިތުރުންވެސް ގިނަ ކުންފުނިތަކަށް ބަދަލު ދީފައިވާއިރު މި ކަމާއި ގިނަ އަދަދެއްގެ ރައްޔަތުންވަނީ ކަންބޮޑުވުން ފާޅުކޮށްފައެވެ.
