ސަންރައިޒް ކޮރޯނާ އިންޓަނޭޝަންލް އާއި މޯލްޑިވްސް އިންސްޓިޓިއުޓް އޮފް ސައިކޮލޮޖިކަލް ސާވިސް،މިޕްސްޓަރ ގުޅިގެން އައްޑޫސިޓީގައި މިމަހުގެ 10 ން 14 އަށް ކުރިއަށްދާ މެންޓަލް ހެލްތް ކޭމްޕަށް ބޮޑު ތަރުޙީބެއް ލިބެމުން އަންނަ ކަމަށް ކޭމްޕްގެ އިންތިޒާމް ކޮމިޓީއިން ބުނެފިއެވެ. މިކޭމްޕްގެ މާކެޓިން ޑިރެކްޓަރ ޒީނަތު ޙަސަން ވިދާޅުވީ ނަފްސާނީ ދުޅަހެޔޮ ކަމާގުޅޭގޮތުން އައްޑޫގައި ކުރިއަށްދާ ކޭމްޕުގައި ހިމެނޭ މަސައްކަތު ބައްދަލުވުންތަކަށް ހީނުކުރާހާ ބޮޑު ތަރުޙީބެއް ލިބެމުން އަންނަ ކަމަށާއި މިއިން ދޭހަކޮށްދެނީ އައްޑޫސިޓީގެ ރައްޔިތުން ނަފްސާނީ ގޮތުން ދުޅަހެޔޮ ބަޔަކަށް ވުމަށް އެދި އެދި ތިބި މިންވަރުގެ ބޮޑުކަންކަމުގައެވެ. “ކޮންމެ ދުވަހަކު ސިޓީގެ އެކި އަވަށްތަކުގައި ތަފާތު އެތައް ސެޝަނެއް ކުރިއަށްދާއިރު ބައިވެރިންގެ ޢަދަދު އެއްދުވަހުން އަނެއް ދުވަހަށް އިތުރު ވަމުން އަންނަނީ. ހީނުކުރާހާ ބޮޑު ތަރުޙީބެއް މިއީ. ބޯވިއްސާރައިގެ ތެރޭގައިވެސް ޑޮކްޓަރ ނާޒްގެ ސެޝަންތަކަށް މީހުން އައިސް ހޯލްތައް ފުރާލާ”.
ޒީނަތު ވިދާޅުވީ މިކޭމްޕްގެ ތެރެއިން ކުރިއަށްދާ ކޮންސަލްޓޭޝަން އަށްވެސް އެޕޮއިންޓްމެންޓްތައް ފުރިފައިވާ ކަމަށާއި އެހެންނަމަވެސް އަދިވެސް އެތައް ބަޔަކު ނަންނޯޓު ކުރުމަށްއެދި ހުށަހަޅަމުން އަންނަ ކަމަށެވެ. މިކޭމްޕްގެ ތެރެއިން ނޫރާނީ ސްކޫލްގައި ކޮންމެ ދުވަހަކު ހެދުނު 9 އަކުން ރޭގަނޑު 10 އަކަށް ޑޮކްޓަރައް ދެއްކުމާއި އެކި އެކި ތެރަޕީ އަދި ތަހުލީލުތައް ހެދުން ކުރިއަށް ދެއެވެ.
އައްޑޫސިޓީގައި ނަފްސާލީ ބަލީގެ އުނދަގޫ ތަހައްމަލު ކުރާ ފަރާތްތަކުން ޑޮކްޓަރަށް ދެއްކުމަށްޓަކައި ވަނީ ކިއު ހަދާފައެވެ. ނޫރާނީ ސްކޫލްގައި ފަރުވާއަށް އެދި މަޑުކޮށްލައިގެން ތިބި ބައެއް މީހުންއެދި އެދި ތިބީ ހޭލާތިބެގެންވެސް ޑޮކްޓަރ ނާޒްއަށް ދެއްކޭނެ ވަގުތަކަށެވެ. ސަބަބެއް ކަމުގައި ބައެއް ފަރާތްތަކުން ބުނީ މާލެއާއި ހަމަޔަށް ވެސް ދަތުރު ކުރުމަކީ ދަރިފުޅުގެ ސިޔާސަ ކަމާހެދި ކުރެވޭނެ ކަމަކަށް ނުވާތީ ކަމަށާއި މިކޭމްޕުގެ އެހީ އިންތިހާއަށް ބޭނުން ކަމަށެވެ.
މެންޓަލް ހެލްތް ކޭމްޕްގެ 3 ވަނަ ދުވަސް މިއަދު ބައްދަލު ކުރާއިރު ރޭވަނީ ޝަރަފުއްދީން ސްކޫލްގައި ބެލެނިވެރީންނަށް ޚާއްސަ ސެޝަނެއް ކުރިއަށް ގެންގޮސްފައެވެ. އެސެޝަނަށް ފަހު އައްޑޫސިޓީގެ ފުލުހުންނަށް އަމާޒުކޮށްގެން ބޭއްވި ޚާއްސަ ސެޝަނެއްވެސް ރޭވަނީ ބާއްވާފައެވެ.
މިއަދުވެސް މަރަދޫ،މަރަދޫފޭދޫ އަދި ފޭދުއަށް އަމާޒުކޮށް ސެޝަންތަކެއް ކުރިއަށް ގެންދާއިރު މާދަމާ އޮތީ ޝަންގްރިއްލާ ރިސޯޓުގެ މުވައްޒަފުންގެ ސެޝަނަކާ ހުޅުމީދޫގެ ބެލެނިވެރިންނަށް ޚާއްސަ ސެޝަނެކެވެ.
މިމަހުގެ 14 ގެ ނިޔަލަށް ކުރިއަށްދާ މިކޭމްޕްގެ ސްޕޮންސަރުންގެ ތެރޭގައި ޝަންގްރިއްލާ،އީކުއޭޓަރ ވިލެޖް،އޭއޯނިއުސް،ޕީއެސްއެމް،އައްޑޫސިޓީ ކައުންސިލް،ކޮންޓްރޯލް ޕީ،އެސް އާރްސީ، ހިތަދޫ ރީޖަނަލް ހޮސްޕިޓަލް،މޯލްޑިވިއަން،ސަންގު، އުތުރު ސައުފު،ގޯ ވިޒިޓް މޯލްޑިވްސް ، ބަޖެޓް ރިސޯޓް،މިޕްސްޓަރ އަދި ޓްރެވެލް ސެންޓަރ މޯލްޑިވްސް ހިމެނެއެވެ.
