ސަންރައިޒް ކޮރޯނާ އިންޓަނޭޝަނަލް އާއި މިޕްސްޓަރ ގުޅިގެން އައްޑޫ ސިޓީ ހިތަދޫގައި މެންޓަލް ހެލްތް ކޭމްޕެއް ބާއްވަން ހަމަޖައްސައިފިއެވެ. މިމަހުގެ 10 އަކުން 12 އަށް ހިންގާ މި ކޭމްޕަކީ އައްޑޫ ސިޓީގެ ސްކޫލް ތަކުގެ ދަރިވަރުންނައި މުދައްރިސުން އަދި ބެލެނިވެރިންގެ މެދުގައި ނަފްސާނީ ދުޅަހެޔޮ ކަމަށް ހޭލުންތެރިކުރުވާ، ނަފްސާނީ އެކި އެކި މައްސަލަތައް ތަޙައްމަލު ކުރަމުންދާ ފަރާތްތައް ދެނެގަނެ އެފަރާތްތަކަށް ލިބެންޖެހޭ އަޅާލުމާއި އެހީތެރިކަން ހޯދައިދީ މުޖުތަމަޢުން އެފަދަ ފަރާތްތަކާމެދު ދެކޭ ގޮތް ބަދަލުކޮށް، ފަރުވާ ހޯދުމުގެ ފުރުޞަތު ރަށުގައި ތިބެގެން ފަހިކޮށް ދިނުމުގެ މަޤްޞަދުގައި ބޭއްވޭ ކޭމްޕެކެވެ. މުޅިން ހިލޭ ބައިވެރި ވުމުގެ ފުރުސަތު ހުޅުވާ ލެވިފައިވާ މިކޭމްޕްގައި ބައިވެރިންނަށް ނަފްސާނީ ދުޅަހެޔޮ ކަމާ ގުޅޭ އެކި މައުޟޫއުތަކަށް މަޢުލޫމާތު ފޯރުކޮށްދެވޭ މަސައްކަތު ބައްދަލުވުންތަކާއި ސެޝަންތައް ކުރިއަށް ދާނެ އެވެ. މީގެ އިތުރުން ނަފްސާނީ ބަލީގެ ޚާއްސަ ޑޮކްޓަރުންގެ ކޮންސަލްޓޭޝަންއާއި އެކި އެކި ތަޙްލީލު ތަކާއި ތެރަޕީ ފަދަ ތަފާތު ޚިދުމަތްތައް ވެސް ބޭނުންވާ ފަރާތްތަކަށް ފޯރުކޮށްދެވޭނެއެވެ.
އައްޑޫސިޓީގައި ނަފްސާނީ ބަލީގެ ތަޙްލީލުތައް ކޮށް ފަރުވާ ދިނުމުގެ ޚިދުމަތްތަކެއް އަދި ފެށިފައެއް ނުވެއެވެ. މިކޭމްޕްގެ ސަބަބުން މިސިޓީގައި މިފަދަ ފަރުވާއަށް ބޭނުންވެފައިވާ އެތައް ބަޔަކަށް ހެޔޮ އަގުގައި މިޚިދުމަތް ލިބިގެންދާނެއެވެ. މިކޭމްޕަށް އައްޑޫއަށް ވަޑައިގަންނަވާ ބޭފުޅުންގެ ތެރޭގައި ރާއްޖޭގެ މަޝްހޫރު ނަފްސާނީ ބަލިތަކުގެ ޚާއްސަ ޑޮކްޓަރ ،ޑޮކްޓަރ އައިޝަތު ޢަލީ ނާޒު ހިމެނިވަޑައިގަންނަވައެވެ. މިކޭމްޕް ހުޅުވުމުގެ ރަސްމިއްޔާތު އޮންނާނީ މިމަހުގެ 9 ވާ ބުދަ ދުވަހުގެ ރޭ ގަމުގެ އީކުއޭޓަރ ވިލެޖްގައެވެ. ކޭމްޕްގައި ބައިވެރި ވުމަށާއި ޑޮކްޓަރަށް ދެއްކުމަށް ނަންނޯޓު ކުރުމުގެ އިންތިޒާމް 9150529 މި ނަމްބަރަށް ގުޅުއްވުމުން ހަމަޖެހިގެންދާނެއެވެ.
