އއ. ތޮއްޑޫގައި ހިނގި މާރާމާރީއެއްގައި ޒުވާނަކަށް އަނިޔާވެ، އިތުރު ފަރުވާ އަށް މާލެ ގެނެސްފި އެވެ.
ފުލުހުންނާއި ހަވާލާދީ “ސީއެންއެމް” އިން ރިޕޯޓްކުރާ ގޮތުގައި އެރަށުގައި މާރާމާރީއެއް ހިނގިކަމުގެ ޚަބަރު ފުލުހުންނަށް ލިބުނީ މިއަދު ހެނދުނު 07:30 ހާއިރު ކަމަށާއި، މޫސުން ގޯސްވުމުގެ ސަބަބުން ދިމާވި ދަތިތަކުގެ ސަބަބުން ފުލުހުންނަށް ތޮއްޑޫއަށް ދެވުނީ ހެނދުނު 11:00 ގައި ކަމަށެވެ. އަދި އެ މާރާމާރީގައި އަނިޔާވެފައި ވަނީ އުމުރުން 26 އަހަރުގެ ފިރިހެނަކަށް ކަމުގައިވެސް ފުލުހުން ބުނެ އެވެ.
އޭނާ އަށް ތޮއްޑޫ ސިއްޙީ މަރުކަޒުގައި ފަރުވާދިނުމަށްފަހު، މިހާރު އިތުރު ފަރުވާއަށް މާލެ ގެނެސްފައިވާ ކަމަށާއި، އޭނާގެ ބޯ ފަޅައިގެން ގޮސްފައިވާއިރު އެކިވަރުގެ އަނިޔާތައްވެސް ލިބިފައިވާ ކަމަށް ފުލުހުން ބުނެއެވެ.
މި މައްސަލައާއި ގުޅިގެން މިހާތަނަށް އެއްވެސް މިހާރު ހައްޔަރުކޮށްފައެއް ނުވެއެވެ. ފުލުހުންގެ ޓީމެއް މިހާރު ތޮއްޑޫގައި ޙަރަކާތްތެރިވަމުންދާއިރު، މި މައްސަލަ ފުލުހުން ދަނީ އިތުރަށް ތަޙުޤީޤުކުރަމުންނެވެ.