ސައިޑްމައުންޓް ޑައިވް ޓްރޭނިންގ މޯލްޑިވްސް ޕޮލިސް ސާވިސްގެ 13 ފުލުހަކު ފުރިހަމަކޮށްފިއެވެ.
ޖުލައި 9 ވަނަދުވަހުން ފެށިގެން 12 ވަނަ ދުހާހަމައަށް ކުރިއަށް ގެންދި ޔަ މި ޓެރޭނިންގ އަކީ ކ. މާފުށި ޑައިވް ސެންޓަރާ ގުޅިގެން ކުރިއަށް ގެންދިޔަ ޓްރޭނިންގ އެކެވެ.
ފުލުހުންގެ އޮފިޝަލް ވެބްސައިޓްގައި ވިދާޅުވެފައިވަނީ، ސައިޑްމައުންޓް ޑައިވް ޓްރޭނިންގ އަކީ ފުލުހުންގެ ތަހުޤީޤުތަކަށާއި މަސައްކަތްތައްކަށް ބޭނުންވާ ހުނަރާއި ޤާބިލްކަން އިތުރުކުރުމަށްޓަކައި ރައްކާތެރިކަމާއެކު ގިނަ ވަގުތު ކަނޑުގެ އަޑީގައި ފީނުމަށް ބޭނުންވާނެ ހުނަރު ދަސްކޮށްދިނުމަށް ހިންގުނު ޓްރޭނިންގ އެއްކަމަށެވެ.
މި ޓްރޭނިންގ ފުރިހަމަ ކުރި ފުލުހުންނަށް ސެޓްފިކެޓް ހަވާލުކޮށްދެއްވީ 2019 ޖުލައި 12 ވަނަ ދުވަހު މާފުށި ޑައިވް ސެންޓަރުގައި ބޭއްވި ރަސްމިއްޔާތެއްގައި އެސިސްޓެންޓް ކޮމިޝަނަރ އޮފް ޕޮލިސް އިސްމާޢީލް ނަވީންއެވެ. މިޓްރޭނިންގ ނިންމުމަށް ބޭއްވި ރަސްމިއްޔާތުގައި ވާހަކަ ދައްކަވަމުން އެސިސްޓެންޓް ކޮމިޝަނަރ އޮފް ޕޮލިސް އިސްމާޢީލް ނަވީންވަނީ ޓްރޭނިންގ ފުރިހަމަ ކުރި ބައިވެރިންނަށް މަރުހަބާ ދަންނަވާފައެވެ. އަދި ބައިވެރިންނަށް ދަސްވި ހުނަރުތަކުގެ ބޭނުން އެންމެ ފުރިހަމަ ގޮތުގައި ހިފުމަށް އެދިލައްވާ ކަމަށާއި ޤަވާއިދުން ޑައިވްކުރަމުން ގެންދިއުމަކީ ގިނަ ވަގުތު ވަންދެން ޑައިވް ކުރުމުގެ ހުނަރު ކުރިއެރުވުމަށް ވަރަށް މުހިއްމު ކަމެއްކަމުގައި ދެކިލައްވާ ކަމަށް ނަވީން ވަނީ ވިދާޅުވެފައެވެ.
ފަސްދުވަހުގެ މުއްދަތަށް ކުރިއަށް ގެންދިޔަ މި ޓްރޭނިންގައި މެރިން ޕޮލިހުގެ 9 ޑައިވަރަކާއި ފޮރެންސިކް ސަރވިސަސްގެ 3 ޑައިވަރެއްގެ އިތުރުން ސްޕެޝަލް އޮޕަރޭޝަންސްގެ ޑިޕާޓްމަންޓްގެ ޑައިވަރަކާއެކު މުޅިޖުމްލަ 13 ޑައިވަރުން ބައިވެރިވެފައިވެއެވެ. މި ޓްރޭނިންގައި ކިޔާވައިދެއްވީ ޕަޑީގެ ކޯސް ކޯޑިނޭޓަރ މިސްޓަރ ކޭވް ޓާނަރ ކަމަށްވެސް ފުލުހުންގެ ވެބްސައިޓްގައި ވިދާޅުވެފައި ވެއެވެ.
