އެއްދަންފަޅިއަށް ކިޔަވައިދޭ ސްކޫލުތަކުގެ ކިޔެވުން ފަށާނީ ހެނދުނު 8 ޖަހާއިރު ކަމުގައި މިނިސްޓްރީ އޮފް އެޑިޔުކޭޝަނުން ބުނެފިއެވެ.
ދިރާސީ އަހަރުގެ ދެވަނަ ޓާރމުގައި ފަށާފައިވާ އެއްދަންފަޅިއަށް ކިޔަވައިދިނުމުގެ ޕައިލެޓް ޕްރޮޖެކްޓާ ގުޅުވައިގެން ދެކެވެމުންދާ ބައެއް ވާހަކަތަކާއި ގުޅިގެން އެޑިއުކޭޝަން މިނިސްޓްރީން ވިދާޅުވީ، އެއްދަންފަޅިއަށް ކިޔަވައިދިނުމުގެ ޕައިލެޓް ޕްރޮޖެކްޓު ފަށާފައިވާ 22 ސްކޫލުގައިވެސް ސެޝަން ފެށޭނީ ހެނދުނު 8 ޖަހާއިރުކަމަށެވެ. އަދި ދަރިވަރުންގެ ކިޔެވުން ފެށޭނީ ކޮންމެ ދުވަހެއްގެވެސް ހެނދުނު 6 ޖަހާއިރު ކުރިއަށްގެންދާ ސުޕަރވައިޒްޑް އެކްސަޒައިޒް ޕްރޮގްރާމެއްގައި ބައިވެރިވުމަށްފަހުކަމަށާ، މި ގަޑިތަކަށް ކަނޑައަޅާފައިވަނީ ސްކޫލްތަކާއި ބެލެނިވެރިންނާއެކު މަޝްވަރާކުރުމަށްފަހު ކަމަށްވެސް އެމިނިސްޓްރީން ވިދާޅުވެއެވެ.
ޕައިލެޓް ޕްރޮޖެކްޓް ކުރިއަށްގެންދާ 22 ސްކޫލުގެ ތެރެއިން އެއް ސްކޫލަކުން ކަސްރަތު ޕްރޮގްރާމުގައި ދަރިވަރުން ބައިވެރިކުރުވުމަށްފަހު، ގެއަށްގެންގޮސް އަލުން ދަރިވަރުން ސްކޫލަށް ގެނެއުމަށް ދަތިވާކަމުގެ ޝަކުވާ ބެލެނިވެރިން ކޮށްފައިވާތީ، އެ ސްކޫލުގައި ކަސްރަތު ޕްރޮގްރާމް ހެނދުނު 7 ޖަހާއިރު ފެށުމަށް ނިންމާފައިވާކަމަށްވެސް އެޑިއުކޭޝަން މިނިސްޓްރީން ވިދާޅުވެއެވެ. އެއްދަންފަޅިއަށް ކިޔަވައިދިނުމުގެ މޮޑެލް އެހެން ސްކޫލްތަކަށް ތަޢާރަފުކުރާއިރު، ޕައިލެޓް ޕްރޮޖެކްޓުގެ ތެރެއިން ސްކޫލްތަކާއި ބެލެނިވެރިން ހުށަހަޅުއްވާ ޝަކުވާތަކާއި ޚިޔާލުތަކަށް ރިޢާޔަތްކުރާނެކަމަށް އެޑިއުކޭޝަން މިނިސްޓްރީން ވިދާޅުވެއެވެ.
އެއްދަންފަޅިއަށް ސްކޫލުތައް ބަދަލުކޮށް ވަށައިޖެހޭ ތައުލީމެއް ފޯރުކޮށް ދިނުމަކީ ސަރުކާރުގެ މުހިއްމު ސިޔާސަތެކެވެ.
