ހާލުގައި ޖެހި، އަސާސީ ހިދުމަތްތަކުން މަހުރޫމުވެފައިވާ ލ. ހިތަދޫގެ އާއިލާއަކަށް އޭޑީކޭ ހޮސްޕިޓަލް ހިންގާ އޭޑީކޭ ޓްރޭޑުން އެހީތެރިވެދީފިއެވެ.
އޭޑީކޭއިން މިފަހަރު އެހީތެރިވި އާއިލާއަކީ ހަތް ކުދިންނާއި މަންމައަކު ހިމެނޭ އާއިލާއެކެވެ. އެ ހުރިހާ ކުދިންވެސް ބައްޕަގެ ލޯބިން މަހުރޫމްވެފައިވާއިރު މިވަގުތު އޭގެ ތެރެއިން ފަސް ކުދިން ދިރިއުޅެމުންދަނީ މަންމައާއެކުއެވެ. މަންމައާ އެކު 18 އަހަރު ނުފުރޭ ފަސް ކުދިން އުޅެމުންދާއިރު، އާމްދަނީ ހޯދުމަށް ދޮށީ ދެ ފިރިހެން ކުދިން ދަނީ މަހަށެވެ. އެކަނިވެރި މައިންނަށް ދައުލަތުން ދޭ އިނާޔަތް، މަންމަ އައިމިނަތު މުހައްމަދަށް ލިބުނު ނަމަވެސް އެއިން ދިރިއުޅުމުގެ ހަރަދުތައް ދެކޮޅެއް ނުޖެހެ އެވެ. އާއިލާގެެ ނިކަމެތިކަމުން މީހުން މަލާމާތް ކުރާތީ ދެން ހުރި 13 އަހަރުގެ ފިރިހެން ކުއްޖާ ސްކޫލަކަށް ނުދެ އެވެ. އެ ކުދިންގެ މަންމައަށް ވަނީ ޖިންސީ ގޯނާއާއި ފުރައްސާރަ ކުރިމަތިވެފައެވެ. އެ އާއިލާއަށް ފާހާނާ ކުރެވެނޭ ނިޒާމެއްވެސް ގޭގައި ނުހުންނައިރު، ގޭގައި އޮންނަނީވެސް އެންމެ ގޮދަނޑިއެކެވެ.
އޭޑީކޭ ކޮމްޕެނީގެ ސީނިއާ މެނޭޖަރު މުހައްމަދު ޖިނާން ވިދާޅުވި ގޮތުގައި އައިމިނަތު އާއިލާއާ ބައްދަލުވެ، އެ މީހުންގެ ދިރިއުޅުން ހުރިގޮތް ފެނުމުން ވަރަށް އަސަރު ކުރި އެވެ. އެހެންވެ، އެ މީހުންނަށް އެހީވުމަކީ މަޖުބޫރުކަމެއް ކަމަށް ދެކިގެން މަސައްކަތް ފެށީ ވީއެންމެ އަވަހަކަށް އެ އެހީތެރިކަން ފޯރުކޮށްދިނުމަށެވެ.
އެގޮތުން އޭޑީކޭއިން ވަނީ އެ އާއިލާގެ ހާލަތު ބެލުމަށްފަހު 10 ދުވަސްތެރޭ އެހީ ހިފައިގެން ހިތަދޫއަށް ގޮސްފައެވެ. އެގޮތުން އެ އާއިލާއަށް އުޅެވޭނެ ރަނގަޅު ފެންވަރެއްގެ އިމާރާތެއް އަޅައިދީ ގެއަށް ބޭނުންވާ ފަރުނީޗަރު ފަދަ ތަކެތި ވަނީ ބަހައްޓައިދީފައެވެ.
އޭގެ އިތުރުން ސްކޫލަށް ނުދާ ކުއްޖާއަށް ސްކޫލަށް ބޭނުންވާ ތަކެތި ފޯރުކޮށްދީ އޭނާ ވަނީ އަނބުރާ ސްކޫލަށްދާން އެހީތެރިވެދީފައެވެ.
ނިކަމެތި އާއިލާތަކަށް އެހީވުމަށް ކޮންމެ އަހަރަކު ވެސް އޭޑީކޭއިން ޕްރޮގްރާމްތައް ހިންގަ އެވެ. މިދިޔަ އަހަރު އެ ކުންފުނިން ވަނީ ނުކުޅެދުންތެރިކަން ހުންނަ ކުދިން އުޅޭ އދ. އޮމަދޫގެ އާއިލާއަކަށް ގިނަ އެހީތައް ދީ ގެ މަރާމާތުކޮށްދީފަ އެވެ.
