ނޭޝެނެލް ސޯޝަލް ޕްރޮޓެކްޝަން އޭޖެންސީ (އެންސްޕާ)ގެ ޑެޕިއުޓީ ސީއީއޯއަކަށް ރައްޔިތުންގެ މަޖިލީހުގައި ކުރިން މަހިބަދޫ ދާއިރާގެ މެންބަރު ކަމުގައި އިންނެވި ރުގިއްޔާ މުހައްމަދު އައްޔަން ކުރައްވައިފި އެވެ.
ރުގިއްޔާ މުހައްމަދަކީ މި ސަރުކާރު އައި ފަހުން އެމްއެމްޕީއާރްސީގެ މެނޭޖިން ޑިރެކްޓަރުކަން ކުރައްވާ ތޮއްޔިބު މުހައްމަދު އަނބިކަނބަލުންނެވެ. ރުގިއްޔާއަކީ ޅ. ހިންނަވަރަށް ނިސްބަތްވާ އަދި ރައީސް އިބްރާހީމް މުހައްމަދު ސޯލިހުގެ އާއިލީ ބޭފުޅެކެވެ.
ނޭޝެނެލް ސޯޝަލް ޕްރޮޓެކްޝަން އޭޖެންސީ (އެންސްޕާ) ވުޖޫދަށް އައިސްފައި ވަނީ 27 އޯގަސްޓް 2008 ގައެވެ. މި އޭޖެންސީގެ މައިގަނޑު މަސައްކަތަކީ ޤައުމީ އިޖްތިމާޢީ ޞިއްޙީ އިންޝުއަރަންސް ސްކީމު ހިންގާ ބެލެހެއްޓުމާއި އިޖްތިމާޢީ ރައްކާތެރި ކަމުގެ ޤާނޫނުގެ ދަށުން ކަނޑައެޅިފައިވާ ޕްރޮގްރާމްތައް ރާވާ ހިންގުމެވެ. އަދި މީގެ އިތުރުން ޤާނޫނީ ގޮތުން ރައީސުލްޖުމްހޫރިއްޔާ އަށް ލިބިދޭ އިޚްތިޔާރުގެ ދަށުން ހަވާލުކުރެވިފައިވާ މަސައްކަތްތައް ހިންގާ ބެލެހެއްޓުމެވެ.
