ލިޔުނީ: ޟިރާރު/
ވޮޝިންޓަނުން ކިތަންމެ ވަރަކަށް ނުރުހުނު ކަމުގައި ވިޔަސް އިރާނުން ތެޔޮ ބޭރު ކުރުން ހުއްޓާނުލާ ކުރިޔަށް ގެންދާނެ ކަމުގައި އިރާނުގެ ރައީސް ޙަސަން ރޫހާނީ ވިދާޅުވެއްޖެ އެވެ.
މިއަދު އެޤައުމުގެ ޤައުމީ ޓީވީން ލައިވްކޮށް ގެނެސްދިން ބްރޯޑްކާސްޓިން ޕްރޮގްރާމެއްގައި ރޫހާނީ ވިދާޅުވީ ކުރިއަށް އޮތް މަސްތަކުގައި އިރާނުން ތެޔޮ ބޭރުކުރަމުން ގެންދާތަން އެމެރިކާ މީހުންނަށް ފެނިގެން ދާނެކަމަށެވެ.
“އިރާނުގެ ތެޔޮބޭރުކުރުން ސުމަކަށް ވައްޓާލަން އެމެރިކާއިން ނިންމި ނިއްމުމަކީ ރަނގަޅު ނިއްމުމެއް ނޫން. އަދި އެއީ އެމީހުން ހެދި ބޮޑު ގޯހެއް. މިކަން އެމިހުންނަށް ކާމިޔާބު ވިޔަކަ ނުދޭނަން.” ރޫހާނީ ވިދާޅުވިއެވެ.
ރޫޙާނީގެ މިވާހަކަތައް މިއައީ އެމެރިކާގެ ދަތިކުރުމުގެ ފިޔަވަޅުތަކާއި ކުރިމަތިލާން ނުޖެހި، އިރާނުގެ ތެޔޮ ގަތުމުގެ ހުއްދަ ޙާއްސަ ވެއިވާސް ތަކުގެ ދަށުން، ވަގުތީ ގޮތުން ބައެއް ޤައުމުތަކަށް ދީފައިވާ ހުއްދައިގެ މުއްދަތު ހަމަވުމުން، އެހުއްދަތައް އާ ނުކުރާނެކަމަށާއި، އަދި މިއާއި ޚިލާފަށް ޢަމަލު ކުރާ ފަރާތްތަކާއި ދޭތެރޭ ދަތިކުރުމުގެ ހަރުކަށި ފިޔަވަޅު އަޅާނެކަމަށް އެމެރިކާއިން ބުނެފައިވާ ދަނޑިވަޅެއްގަ އެވެ.
