ރައްޔިތުން ދެކޭ ހުވަފެންތަކުގައި ކުލަ ޖައްސައި ނުދީފިނަމަ އެދެވެނީ ވަރަށް ނުބައި ދިމާލަކަށް އަދާލަތު ޕާޓީގެ ރައީސް އިމްރާން އަބްދުﷲ ވިދާޅުވެއްޖެ އެވެ.
އަދާލަތު ޕާޓީގެ އޮފީހުގައި ބޭއްވި ނޫސްވެރިންގެ ބައްދަލުވުމެއްގައި އިމްރާން ވިދާޅުވީ ކުރިއަށް އޮތް ދުވަސްތަކުގައި އިތުރަށް ޕާޓީތަކުގެ ގުޅުން ވަރުގަދަކޮށް ގުޅިފައިވާ ކޯލިޝަން ސަރުކާރު ބަދަހިކަމުގައި ފަސް އަހަރު ނުދަމަހައްޓަފައިނަމަ އެބޭފުޅުންނަށް ވޯޓްލީ ބޭފުޅުންނަށް ރައްޔިތުން މާފެއް ނުކުރާނެ ކަމަށެވެ. އެހެން ކަމުން ރައްޔިތުންގެ އުންމީދުތަކާއި އެބޭފުޅުން ދެކޭ ހުވަފެންތަކުގައި ކުލަ ޖައްސައި ނުދީފިނަމަ އެދެވެނީ ވަރަށް ނުބައި ދިމާލަކަށް ކަމަށް އިމްރާން ވިދާޅުވިއެވެ.
އިމްރާން ވިދާޅުވީ، ވައްކަމާއި ކޮރަޕްޝަނާއި ފަސާދައިން ގައުމު ސަލާމަތް ކޮށްދިނީ ރައްޔިތުން ކަމަށާއި ރައްޔިތުން ވޭތުވެދިޔަ އުނދަގޫ ދުވަސްތަކުގައި ދައްކައިދިނީ ވަރަށް ފުރިހަމަ ނަމޫނާއެއް ކަމަށެވެ. ދިވެހި ރައްޔިތުންނަކީ ސާބިތުކަމާއެކު ތިއްބަވައި އެކުވެރިކަމާއެކު މަސައްކަތް ކުރާ ބައެއް ކަމަށް ވެސް އިމްރާން ވިދާޅުވިއެވެ.
އިތުރަށް އިމްރާން ވިދާޅުވީ އިބޫގެ ސަރުކާރަކަށް ރައްޔިތުން އެދުނީ ވަރަށް ގިނަ އުންމީދުތަކެއް ހުރުމާއެކު އެކަންކަން ފުރިހަމައަށް އަދާކޮށްދިނުމަށް މަސައްކަތް ކުރާނެ ކަމަށެވެ. އަދި އިންތިހާބަށްފަހު އިބޫ އާއި އިންތިހާބީ ނައިބު ރައީސް ފައިސަލް ނަސީމް ވަނީ އެ މަސައްކަތް ކުރުމަށް ފައްޓަވައިފައިކަމަށާއި ނަތީޖާ ރައްޔިތުންނަށް ފެންނަން ފަށާފައިވާކަމަށް އިމްރާން ވިދާޅުވި އެވެ.
