އައްޑޫސިޓީގެ ފޭދޫގައި ނެޗްރަލް ގްރާސް ދަނޑެއް އަޅައިދޭނެ ކަމަށް ފުޓްބޯޅައިގެ މައި އިދާރާ، އެފްއޭއެމުން ބުނެފިއެވެ.
ފޭދޫގައި މި ދަނޑު އަޅައިދޭން އެފްއޭއެމުން ނިންމީ މިނިވަން ޗެމްޕއިަންޝިޕް ފުޓްބޯޅަ މުބާރާތުގައި ފޭދޫ ޓީމުން ހޯދާފައިވާ ކާމިޔާބީ ފާހަގަކޮށްފައެވެ.
މި ގޮތުން މިނިވަން ޗެމްޕިއަންޝިޕް މުބާރާތުގެ ޒޯން ޗެމްޕިއަން ޓީމުތަކަކަށް ގްރާސް ދަނޑެއް ދިނުމަށް އެފްއޭއެމުން ވަނީ ނިންމާފައެވެ.
ފޭދޫ އަވަށު އޮފީހަށް އެފްއޭއެމުން މިއަދު ފޮނުވި ސިޓީއެއްގައި ބުނެފައި ވަނީ ތިޔަ ރަށަކީ 2017 ވަނަ އަހަރު މިނިވަން ޗެމްޕިއަންޝިޕް ޒޯން 8 ގެ ޗެމްޕިއަން ޓީމްގެ ހައިސިއްޔަތުން މި ދެންނެވުނު ނެޗްރަލް ގްރާސް ދަނޑުގެ ޕްރޮޖެކްޓަށް ފުރުސަތު ލިބިފައިވާ ރަށެއް ކަމުގައި އުފަލާ އެކު ދަންނަވާ ކަމަށެވެ.
އެހެންވެ އެ ސިޓީގައި ފާހަގަކޮށްފައިވާ ލިޔެކިޔުންތައް މި މަހުގެ 7 ގެ ކުރިން ފޮނުވައި ދިނުމަށް ވެސް އެފްއޭއެމުން އެދިފައިވެ އެވެ.
އޭގެ ތެރޭގައި މިކަމަށް އެދޭ ސިޓީ، ދަނޑު ތަރައްގީ ކުރުމުގެ ތަސައްވުރު، ބިން އެފްއޭއެމާ ހަވާލު ކުރާ ކަމުގެ ލިޔުން، ރަށުގެ ލޭންޑް ޔޫޒް ޕްލޭން، ދަނޑު ބޭނުން ކުރުމާއި ބެލަހައްޓާނެ ގޮތުގެ ތަސައްވުރު އަދި އާމްދަނީ ހޯދާނެ ތަސައްވުރެ ހިމެނެ އެވެ.
