ދުބާއީގައި ބޭއްވުމަށް ހަމަޖެހިފައިވާ “ޝައިޚާ ފާޠިމަތު ބިންތު މުބާރަކް” ދުބާއީ ބައިނަލްއަގްވާމީ ޤުރުއާން މުބާރާތުގައި ބައިވެރިވުމުގެ ފުރުސަތު ރާއްޖެއަށް ލިބިއްޖެއެވެ.
މިމުބާރާތަކީ މިއަހަރު ނޮވެމްބަރު މަހު ހަތަރުވަނަދުވަހުން ފެށިގެން 16 ވަނަދުވަހުގެ ނިޔަލަށް ކުރިޔަށްގެނަދަން ހަމަޖެހިފައި ވާ މުބާރާތެކެވެ. މި މުބާރަތިގައި ބައިވެރި ވުމަށް ރާއްޖެއިން ފުރުސަތު ލިބިފައިވަނީ އަންހެން ބޭފުޅަކަށް ކަމަށް ކީރިތި ޤުރުއާނާބެހޭ މަރުކަޒުން ބުނެއެވެ.
މިމުބާރާތުގައި ބައިވެރި ވެވޭނީ މުޅި ޤުރުއާން ތަޖުވީދުގެ ހަމަތާކާއި އެކު ހިތުދަސްވެފައިވާ އަދި މިއަހަރުގެ ޖެނުއަރީމަހުގެ އެއްވަނަ ދުވަހަށް އުމުރުން 25 އަހަރު ނުފުރޭ އަންހެނަކަށް ކަމަށް ވެސް ކީރިތި ޤުރުއާނާބެހޭ މަރުކަޒުން ބުނެއެވެ. އަދި މުބާރާތުގައި ބައިވެރިވާ ފަރާތަށް އޭނާއަރިހުގައި ދުބާއީއަށްދާ މަހްރަމަކަށް ދެކޮޅުޓިކެޓާއި ހުރުމުގެ ހަރަދުވެސް ޔޫއޭއީ އިން ދޭނެކަމަށް ޤުރުއާނާބެހޭ މަރުކަޒުން ބުނެއެވެ.
އެހެންކަމުން މިމުބާރާތުގައި ރާއްޖެ ތަމުސީލުކުރާނެ ފަރާތެއް ހޮވުމަށް އެކަމަށް ޝަރުތު ހަމަވާ ފަރާތްތަކުން މިއަހަރުގެ ޖުލައި މަހުގެ 31 ވަނަ ދުވަހުގެ 13:30 ގެ ކުރިން އެކަމަށް އެދި ކީރިތި ޤުރުއާނާއި ބެހޭ މަރުކަޒަށް ހުށަހެޅުމަށް އެ މަރުކަޒުން ވަނީ އެދިފައެވެ.
