ޕީޕީއެމްގެ ޕާލަމެންޓްރީ ގުރޫޕުގެ ލީޑަރު އަހުމަދު ނިހާން، އިންޑިއާ އަށް ވަޑައިގަތުމުން އެ ގައުމަށް އެތެރެވިޔަ ނުދީ އިއްޔެ ފޮނުވާލި ސަބަބެއް އަދިވެސް އިންޑިއާ އިން ނުބުނާ ކަމަށް، ރާއްޖެ އިން އިންޑިއާ އަށް ކަނޑައަޅާފައި ހުންނަވާ ސަފީރު އަހުމަދު މުހައްމަދު ވިދާޅުވެއްޖެ އެވެ
ސަފީރު އަހުމަދު މުހައްމަދު ވަނީ، ޕްލޮމެޓިކް ޕާސްޕޯޓްގައި އިންޑިއާގެ ޗެންނާއީ އަށް ބޭސްފަރުވާއަށް ނިހާން ވަޑައިގަތުމުން ހަތަރު ގަޑިއިރު ވަންދެން ޗެންނާއީގެ އެއާޕޯޓުގައި ބެއިންދުމަށް ފަހު ނިހާން އަބުރާ ރާއްޖެ ފޮނުވާލި މައްސަލައިގައި ކަންބޮޑުވުން ފާޅުކުރައްވާފައެވެ. މި މައްސަލަ އާއިގުޅިގެން އަހްމަދު މުހައްމަދު ވިދާޅުވީ ދައުލަތުގެ އިސް މަގާމެއްގައި ހުރި މީހަކާ ދޭތެރޭ އިންޑިއާއިން ކަންތައް ކުރެއްވި ގޮތުން ހިތާމަކުރައްވާ ކަމަށެވެ
މީގެ އިތުރުން ސަފީރު ވިދާޅުވީ މި މައްސަލަ މީގެ ކުރިން ވެސް ބައެއް ދިވެހިންނަށް އިންޑިއާ އިން ދިމާވެފައިވާކަމަށާއި ދިއްލީ އާއި ޓްރިވެންޑްރަމަށް ދާ ބައެއް ދިވެހިން އަނބުރާ ފޮނުވާލުމުން ސަބަބު ހޯދަން މީގެ ކުރިން ވެސް އެދިފައި ވާނެ ކަމަށާއި އެކަމަކު އެއްވެސް ފަހަރަކު ސަބަބު ބުނެދީފައި ނުވާކަމަށެވެ
