އަންނަ ރިޔާސީ އިންތިޚާބަށް އެމްޑީޕީގެ ފަރާތުން ވާދަކުރެއްވުމުގެ ޓިކެޓު ކުރީގެ ރައީސް މުހައްމަދު ނަޝީދަށް އެ ޕާޓީން މިއަދު އަރުވައިފި އެވެ.
އިންތިހާބުގައި އެމްޑީޕީގެ ޓިކެޓްގައި ވާދަކުރައްވާނީ ކުރީގެ ރައީސް މުހައްމަދު ނަޝީދުކަމަށް އެޕާޓީގެ އާއްމު މެމްބަރުން ނިންމާ ޕާޓީގެ ފަރާތުން ރިޔާސީ ޓިކެޓު ނަޝީދާ ހަވާލުކޮށްދެއްވީ ޗެއާޕާސަން ހަސަން ލަތީފެވެ. ނަޝީދުގެ ފަރާތްޕުޅުން ޓިކެޓާ ހަވާލުވެވަޑައިގަތީ އެމަނިކުފާންގެ ކެމްޕެއިން މެނޭޖަރު ހިތަދޫ އުތުރު ދާއިރާގެ މެމްބަރު މުހައްމަދު އަސްލަމެވެ.
ރައީސް ނަޝީދަށް އެމްޑީޕީ ރިޔާސީ ޓިކެޓް އަރުވާފައިވަނީ މިއަދު ހަވީރު އެމްޑީޕީ ހަރުގޭގައި ބޭއްވި ރަސްމިއްޔާތެއްގައެވެ.
ލަންކާގައި މިހާރު އުޅުއްވާ ނަޝީދު ވަނީ މިއަދުގެ ހަފުލާގައި ސްކައިޕް މެދުވެރިކޮށް ވާހަކަފުޅު ދައްކަވައިފަ އެވެ.
ސިވިލް ކޯޓުގެ އަމުރަކުން ހުއްޓާލަން އަންގާފައި ވަނިކޮށް، މިދިޔަ ބުދަ ދުވަހު ބޭއްވި އެމްޑީޕީގެ ރިޔާސީ ޕްރައިމަރީގައި ނަޝީދު ރިޔާސީ ޓިކެޓު ކަށަވަރު ކުރެއްވީ 43،922 ވޯޓުން ކަމަށް އެމްޑީޕީން ވަނީ ބުނެފަ އެވެ. ޕްރައިމަރީގައި އެމަނިކުފާނާ އެއްވެސް ބޭފުޅަކު ވާދައެއް ނުކުރައްވަ އެވެ.
