ރާއްޖޭގެ ސްކޫލްތަކުގައި ކިޔަވައިދިނުމުގައި ޓެބްލެޓް ބޭނުންކުރުމަށް ނިންމާ ޓީޗަރުންނަށް ޓެބްލެޓް ދޫކުރުމަށް އިސްކަންދަރު ސުކޫލްގައި މިއަދު ހާއްސަ ރަސްމިއްޔާތެއް ބާއްވައިފި އެވެ.
މިއަދު އެ ސްކޫލްގައި ބޭއްވި ރަސްމިއްޔާތުގައިި ޓީޗަރުންނާއި ޓެބްލެޓް ހަވާލުކޮށްދެއްވީ އެޑިޔުކޭޝަން މިނިސްޓަރު ޑރ.އައިޝަތު ޝިހާމްއެވެ.
މި ރަސްމިއްޔާތު ޝަރަފްވެރިކޮށްދެއްވާ ވާހަކަފުޅުދައްކަވަމުން އެޑިއުކޭޝަން މިނިސްޓަރު ޑރ. އައިޝަތު ޝިހާމް ވިދާޅުވީ 21 ވަނަ ގަރުނަށް ފައްކާކުރެވިފައިވާ ދަރިވަރުން ތައްޔާރުކުރުމަށް، ކިޔަވައިދިނުމުގައި އިންފޮމޭޝަން ކޮމިއުނިކޭޝަން ޓެކްނޮލޮޖީއާއެކު ޓެބްލެޓް ބޭނުންކުރަން ފަށާފައިވާ ކަމަށެވެ. އެގޮތުން ޓެބްލެޓް ބޭނުންކުރުމަށް ޓީޗަރުންނަށް އަމާޒުކުރެވިގެން ލެވަލް އެކެއް އަދި ދޭއްގެ ތަމްރީނުތައް ރާއްޖޭގެ ހުރިހާ ޓީޗަރުންވެސް ފުރިހަމަކުރައްވާފައިވާ ކަމަށެވެ.
މިނިސްޓަރު ވިދާޅުވީ މިއަދު އިސްކަންދަރު ސްކޫލްގެ ޓީޗަރުންނާ ޓެބްލެޓް ހަވާލުކުރިނަމަވެސް، ކުރިއަށް އޮތް މަދު ދުވަސްކޮޅުގެ ތެރޭގައި ރާއްޖޭގެ ހުރިހާ ޓީޗަރުންނަށް ޓެބްލެޓް ހަވާލުކުރެވޭނެ ކަމަށެވެ.
ޓީޗަރުންނަށް މިއަދު ޓެބްލެޓް ހަވާލުކުރެވިފައިވާއިރު އެކަމުގެ ސަބަބުން ޓީޗަރުންނަށް ފަސޭހައިން މައުލޫމާތު ލިބި ޓީޗަރުންނަށް ކިޔަވައިދިނުމުގައި ފަސޭހަވެގެންދާނެ ކަމަށްވެސް މިނިސްޓަރ ޝިހާމް ވިދާޅުވިއެވެ.
މީގެއިތުރުން ޓެބްލެޓްތަށް ދަރިިވަރުންނާއި ޓީޗަރުންނަށް ދިނުމުގެ މައިގަނޑު ބޭނުމަކީ ތައުލީމީ ގޮތުން ކުރިއަރަފައިވާ ތަހުޒީބީ މުޖުތަމައަކަށް ހެދުން ކަމުގައިވެސް މިނިސްޓަރ ވިދާޅުވިއެވެ.
ޑރ. އައިޝަތު ޝިހާމް އިތުރަށް ވިދާޅުވީ މިފަދަ ކޮންމެ ބަދަލެއްގައިވެސް ކަންބޮޑުވާ ކަންތައްތަކެއް ވެސް ހުންނާނެ ކަމަށާއި، އެހެންކަމުން ސްކޫލްތަކުން ބެލެނިވެރިންނަށް ދެއްވަންޖެހޭ މައުލޫމާތު ލަސްނުކޮށް ދެއްވުމަކީ ވަރަށް ބޮޑު އެދުމެއް ކަމަށާއި މިކަމުގައި ބެލެނިވެރިންގެ އެއްބާރުލުން ވެސް ވަރަށް މުހިންމު ކަމަށެވެ.
ދަރިވަރުން ސްކޫލަށް ގެންދަންޖެހޭ ޓެކްސްޓް ފޮތުގެ ބަދަލުގައި ޓެބްލެޓަ ބޭނުން ކުރުމަށް ސަރުކާރުން ނިންމާފައިވާއިރު، މިއަހަރަށް ލަފާކޮށް ރައްޔިތުންގެ މަޖިލީހުން ފާސްކުރި ބަޖެޓުގައި މިމަޝްރޫއު ކުރިއަށް ގެންދިއުމަށް 154 މިލިއަން ރުފިޔާ ވަނީ ކަނޑައަޅާފަ އެވެ.
