English Edition
Dhivehi Edition
ލިޔުއްވާފައިވަނީ: އިބްރާހީމު ރަޝީދު މޫސާ

ކީރިތި ރަސޫލާ ބަޔާންކޮށް ދެއްވާފައިވާ ގޮތުގައި ރަމަޟާން މަހަކީ ބަރަކާތްތެރި މަހެކެވެ.އެމަހުގައި ރޯދަ ހިފުން ފަރްޟުކުރެއްވިއެވެ. އަދި އެ މަހުގެ ރޭތައް އިޙްޔާކޮށް ދިރުވުން ސުންނަތެއްކަމުގައި ލެއްވިއެވެ.
އެއީ އުފާވެރިކަމުގެ މަހެވެ. އެއީ ބާއްޖަވެރިކަމުގެ މަހެވެ.އެއީ އަމާންކަމުގެ މަހެވެ. އެ މަހުގައި ސުވަރުގޭގެ ދޮރުކޮޅުތައް ހުޅުއްވައި ދެއްވާތީއެވެ. އެ މަހުގައި ނަރަކައިގެ ދޮރުތައް ބަންދުކޮށް ދެއްވާތީއެވެ. ޝައިޠާނާ ކަސްތޮޅު އަޅުއްވައި ހެޔޮކަމުގެ މަގު ތަންމިނަށް ހުޅުއްވައި ދެއްވާތީއެވެ.

އެއީ ޝައިޠާނާ ނިކަމެތި ވެގެންދާ މަހެވެ.ސުވަރުގޭގެ އަށް ދޮރުކޮޅު ހުޅުއްވާ ދެއްވާ އިރު ނަރަކައި ދޮރުތައް ބަންދު ކުރައްވައެވެ. އަދި ކޮންމެ ރެއަކު އެތައް ބަޔަކު ނަރަކައިން މުއްތި ކުރައްވައެވެ. މަލާއިކަތް ބޭކަލުން މީސްތަކުންނަށް ހެޔޮކަންތައް ކުރުމަށް ކުރިމަތިލުމަށާއި ނުބައި ކަންތައްތަކަށް ފުރަގަސް ދިނުމަށް ގޮވައިލައްވައެވެ.

އެ މަހަކީ އެ މަހުގެ ފުރަތަމަ ދިހަ ދުވަހުގައި ﷲގެ ރަޙްމަތް ލައްވާފައިވާ މަހެވެ. އެ މަހުގެ މެދު ދިހައިގައި ﷲގެ ފުއްސެވުން ލައްވާފައިވާ މަހެވެ. އެ މަހުގެ ފަހު ދިހައިގައި ނަރަކައިން މުއްތިކުރެއްވުން ލައްވާފައިވާ މަހެވެ. މި ކަހަލަ ދެވަނަ މަހެއް ނެތެވެ.

މަހުގެ ޝިޢާރު

އެހެންކަމުން މި މަހުގެ ޝިޢާރަކަށް ހަދަންވީ ހެޔޮކަމުގައި އަހުރެން ޖަހާލައިފާ އެކަކު ވެސް ކުރިއެރިއަކަ ނުދޭނަމެވެ. ރޯދަ ހިފުމުގައެވެ. މިސްކިތުގައި ޚުޝޫޢަތްތެރިކަމާއެކު ނަމާދު ކުރުމުގައެވެ. ތަރާވީޙު ނަމާދާއި ތަހައްޖުދު ނަމާދު ފަދަ ރަމަޟާން މަސް އިޙްޔާކުރުމުގެ ދަރުބާރުތަކުގައެވެ. ފަޤީރުންނަށް ޞަދަޤާތް ދިނުމާއި ،ހެޔޮ ފޯރުވުމުގައެވެ. ރޯދަވެރިންނަށް ރޯދަ ވީއްލުމުގައި އެހީވެދިނުމުގައެވެ. ގޭ ތެރޭގައި ޤުރްއާނުގެ އަޑު ގުގުމައިލުމުގައެވެ. މަގުމަތީގައި މަޑުމައިތިރިވުމާއި، މަޑުމޮޅިވުމުގައެވެ. ރިވެތި އަދަބާއި، ޚުލްޤުން މީހުންނާ މުޢާމަލާތު ކުރުމުގައެވެ.މީހަކު ޖެއްސުން ކުރުމުގެ ގޮތުން އެއްޗެއް ބުނިކަމުގައި ވިޔަސް ” އަހުރެން މި ހުރީ ރޯދައަށޭ ” ކިޔާފައި އޭނާއަށް ރައްދު ނުދީ ދުރަށް ދިޔުމުގައެވެ.

އު އުސްމިންތަކަކަށް ވާޞިލުވުން

ރަމަޟާނީ މި ޖައްވުގެ ތެރޭގައި، ރޫޙާނީ މައިދާނުގެ ދަގަތްފާނައިގެ ސަބަބުން، އައު އުސްމިންތަކަކާ ހަމައަށް ވާޞިލުވެވުމަކީ އަޖައިބުވަނިވި ކަމެއް ނޫނެވެ. މި މަތިވެރި އަޅުކަމުގެ ސަބަބުން ކޮންމެ ދުވަހަކު ރަމަޟާނީ އުދަރެހުގެ ހަ ފަރާތުގެ ތެރޭގައި ނަފްސު ޠާހިރު ކުރެވިގެންދާ ނަމަ އައު އުސްމިންތަކާ ހަމައަށް ވާޞިލުވެވޭނެއެވެ. ރޯދަވެރިއާއަށް ރޯދަ ވީއްލާ އިރު ލިބިފައިވާ އިޖާބަވަނިވި ދުޢާގެ އުޅަނދުގައި ގުރަހަތަކާއި ގުރަހަލިތަކާއި ގުރަހާނާތައް ފަހަނަޅާ ގޮސް ﷲގެ ޙަޟްރަތާ ހަމައަށް ވާޞިލު ވެވޭނެތީއެވެ.

މިހެންވެ ސަލަފުންނަކީ ރަމަޟާން މަހަށް ތައްޔާރުވެ ވަޑައިގެން ބޭކަލުންތަކެކެވެ. ރަމަޟާން މަހާ ވިދިގެން އަންނަ ފުރަތަ ހަ މަސް ދުވަހުގައި އެބޭކަލުންގެ ދުޢާއަކީ ވޭތުވެދިޔަ ރަމަޟާން މަހުގައި ކުރެއްވި ހެޔޮ ކަންތަކާއި އަޅުކަންތައް ޤަބޫލުކުރައްވާތޯ އަރަހުށި ﷲއަށް ދެންނެވުމެވެ. އަނެއް ހަ މަސް ދުވަހުގައި އެ ބޭކަލުންގެ ދުޢާއަކީ ކުރިއަށް އޮތް ރަމަޟާން މަހާ ހަމައަށް ފޯރުކޮށްދެއްވާތޯ ، އެ ބޭކަލުންގެ ވެރި ރަސްކަލާނގެއަށް ދެންނެވުމެވެ. ޔަޙްޔާ ބުނު ކަޘީރު ވިދާޅުވާ ގޮތުގައި އެބޭކަލުންގެ ދުޢާއަކީ ” ހައްދަވާ ބޮޑުކުރެއްވި ރަސްކަލާކޮ! މިއަޅާ ރަމަޟާން މަހަށްޓަކައި ރައްކައުތެރިކޮށް ދެއްވާނދޭވެ! އަދި މި އަޅާއަށްޓަކައި ރަމަޟާން މަސް ސަލާމަތްތެރި ކޮށްދެއްވާނދޭވެ!
ނޯޓް: މިއީ ލިޔުންތެރިންގެ ގުޅުން މި ވެބްސައިޓްގައި އިބްރާހިމް ރަޝީދު މޫސާ ލިޔުއްވަވާފައިވާ ލިޔުމެކެވެ.