މިއަހަރުގެ ފިތުރު ޒަކާތް އިސްލާމިކް މިނިސްޓްރީން ބަލައިގަންނަން ފަށާނީ ރަމަޟާން މަހުގެ ފަސް ވަނަ ދުވަހުން ފެށިގެން ކަމަށް އެ މިނިސްޓްރީން ބުނެފިއެވެ.
އެ މިނިސްޓްރީން ވަނީ މި އަހަރުގެ ފިތުރު ޒަކާތް މާލެއާއި އަތޮޅުތަކުގައި ބަލައިގަންނަ ވަގުތަކާއި ޒަކާތް ބަލައިގަންނަ ތަންތަނާއި، ޒަކާތުގެގޮތުގައި ދައްކަންޖެހޭ މިންވަރު ވެސް އާންމުކޮށް އިއުލާންކޮށްފަ އެވެ.
އެހެން އަހަރުތަކެކޭ އެއްފަދައިން މި އަހަރުވެސް މާލެއާއި އަތޮޅު ތެރޭގައި ފިޠުރު ޒަކާތް ބަލައިގަތުމުގެ އިންތިޒާމުތައް ހަމަޖެހިފައިވާ ކަމަށާއި ރަށްރަށުގައި ޒަކާތް ބަލައިގަންނާނީ އެރަށެއްގެ ރަށު ކައުންސިލް އިދާރާއިން ކަމަށް މިނިސްޓްރީގެ އިއުލާނުގައި ވެއެވެ.
އަތޮޅުތަކުގެ ރަށްރަށުގައި ޒަކާތް ބަލައިގަންނާނީ ރަށު ކައުންސިލަށެވެ. މާލޭގައި އިސްލާމީ މަރުކަޒާއި، ހުޅުމާލޭ ކޮމިއުނިޓީ ސެންޓަރާއި ހައުސިން މިނިސްޓްރީގެ ވިލިމާލެ ޔުނިޓުންނެވެ. އައްޑު އާއި ފުވައްމުލަކާއި، ގދ. ތިނަދޫގައި ޒަކާތް ބަލައިގަންނާނީ މިނިސްޓްރީއިން ކަނޑައަޅާފައިވާ ތަންތަނުންނެވެ.
މާލޭގައި ޒަކާތް ބަލައިގަންނާނީ އިސްލާމިކް މިނިސްޓްރީން ކަމަށާއި ރަމަޟާން މަހުގެ ފަސް ވަނަ ދުވަހުން ފެށިގެން ރަމަޟާން މަހުގެ 29 ވަނަ ދުވަހުގެ (ޖޫން މަހުގެ 13 ވަނަ ދުވަސް) ނިޔަލަށް ޒަކާތް ބަލައިގަންނާނެ ކަމަށް އެ މިނިސްޓްރީން ބުނެއެވެ. ޒަކާތް ބަލައިގަންނާނީ ހެނދުނު 10:30 ން މެންދުރު 13:00 އަށެވެ،
ހުޅުމާލޭ ކޮމިއުނިޓީ ސެންޓަރުންނާއި ވިލިމާލޭގައި ހުންނަ ހައުސިން މިނިސްޓްރީގެ ވިލިމާލޭ ޔުނިޓުން ފިތުރު ޒަކާތް ބަލައިގަންނާނީ ރަމަޟާން މަހުގެ ފަސް ވަނަ ދުވަހުން ރަމަޝާން މަހުގެ 26 ވަނަ ދުވަހުގެ (ޖޫން މަހުގެ 10 ވަނަ ދުވަސް) ނިޔަލަށް ކަމަށް އިސްލާމިކް މިނިސްޓްރީން ބުނެއެވެ. އެ ދެ އޮފީހުންވެސް ޒަކާތް ބަލައިގަންނާނީ ހެނދުނު 10:30 ން މެންދުރު 13:00 އަށް ކަމަށް އިސްލާމިކް މިނިސްޓްރީން ބުނެއެވެ.
ފިތުރުޒަކާތުގެ މިންވަރުގެ ގޮތުގައި ކަނޑައަޅާފައިވަނީ މީހަކަށް 2.4 ކިލޯ ހަނޑުލުގެ މިންވަރެވެ. ކޮންމެ މީހަކުވެސް ޒަކާތް ދައްކަންޖެހޭނީ އެމީހަކު ޢާއްމުކޮށް ކައިއުޅޭ ހަނޑުލުގެ ބާވަތުގެ 2.4 ކިލޯ ހަނޑުލަށްޖެހޭ މިންވަރަށެވެ. މާލޭގައި ދިރިއުޅޭ މީހުން ޒަކާތް ދައްކަން ޖެހެނީ އާދައިގެ ހަނޑުލުންނަމަ މީހަކަށް 13ރ. އެވެ. ތައިލެންޑް ހަނޑުލުންނަމަ 43ރ. އެވެ. ބާސްމަތީ ހަނަޑުލުންނަމަ 81 ރ. އެވެ.
އިސްލާމިކް މިނިސްޓްރީން ބުނި ގޮތުގައި އެސްއެމްއެސް މެދުވެރިކޮށް ދިރާގު އަދި އޫރިދޫ އިން ފިތުރު ޒަކާތް ބަލައިގަންނާނެއެވެ. އަދި އިސްލާމިކް ބޭންކާއި ބޭންކް އޮފް މޯލްޑިވްސް (ބީއެމްއެލް) މެދުވެރިކޮށްވެސް ޒަކާތް ދެއްކޭނެ އިންތިޒާމު ހަމަޖެހިފައިވާ ކަމަށް އިސްލާމިކް މިނިސްޓްރީން ބުނެއެވެ.
