ޖެމްސް މައްސަލައިގާ އުއްތަމަ ފަނޑިޔާރު ޢަބްދުﷲ ސަޢީދުގެ މައްޗަށް މާދަމާ ޙުކުމް ކުރުމަށް ޝެޑިއުލްކުރާ ގޮތަށް ނިންމައިފިއެވެ.
ދައުލަތުގެ ލިޔެކިޔުންތައް ބަދަލު ކުރަން ހަދާފައިވާ ނިޒާމް، ޖެމްސް ހުއްޓުވާލި ކަމަށް ތުހުމަތު ކުރާ މައްސަލައިގެ އަޑުއެހުންތައް ނިންމާލުމަށްފަހު މާދަމާއަށް އުއްތަމަ ފަނޑިޔާރުގެ މައްޗަށް ހުކުމް އިއްވަން ޝެޑިއުލް ކުރާނެ ކަމަށް ކްރިމިނަލް ކޯޓްގެ ގާޒީ މިއަދު ވިދާޅުވެއްޖެ އެވެ.
މާދާމާ އޮންނާނީ ކުށް ސާބިތުވޭތޯ ނުވަތަ ނޫންތޯ ބަލާ ކުށް ސާބިތުވާ ނަމަ އަދަބު ކަނޑައަޅާ މަޖިލިސް ކަމަށް މިއަދުގެ އަޑުއެހުން ނިންމަވާލައްވަމުން ގާޒީ ވަނީ ވިދާޅުވެފައެވެ. މިފަހަރު އެމަނިކުފާނުގެ މައްޗަށް ކުރެވޭ ދައުވާ އަކީ ދިވެހިރާއްޖޭގެ އިއްޒަތްތެރި ރައީސުލްޖުމްހޫރިއްޔާ ޢަބްދުﷲ ޔާމިން ޢަބްދުލްޤައްޔޫމް ސުޕްރީމް ކޯޓަށް ފޮނުއްވި ސިޓީތަކެއް ބަލައިނުގަތުމަށް ޖެމްސް ހުއްޓުވުމަށް އުއްތަމަ ފަނޑިޔާރު އެންގެވި ކަމަށްބުނެ، ދައުލަތުގެ މަސައްކަތަށް ހުރަސް އެޅުމުގެ ދައުވާއެވެ.
އެ ދައުވާ ސާބިތުވެއްޖެ ނަމަ، ހަތަރު މަހާއި 26 ދުވަހުގެ ޖަލު ހުކުމެއް އުއްތަމަ ފަނޑިޔާރުގެ މައްޗަށް އަންނާނެ އެވެ. އެ މަނިކުފާނުގެ މައްޗަށް ބޮޑެތި އެހެން ތުހުމަތު ތަކެއްވެސް ކޮށް ތަޙުޤީޤީ މަރުހަލާ ދަނީ ކުރިޔަށެވެ.
