ކުރީގެ ރައީސް މައުމޫން އަބްދުލް ގައްޔޫމުގެ ހާލުކޮޅު މިހާރު ވަރަށް ގޯސް ކަމަށާއި އެމަނިކުފާނުގެ އަރިހުގައި އަބަދު ވެސް މީހަކު ބަހައްޓަން ޑޮކްޓަރ ލަފާދީފައިވާ ކަމަށް އެމަނިކުފާނުގެ ގާނޫނީ ވަކީލު މުހައްމަދު ފައިސަލު ވިދާޅުވެއްޖެއެވެ.
ފައިސަލު މިއަދު ކުރެއްވި ޓްވީޓެއްގައި ވިދާޅުވީ، ރައީސް މައުމޫންގެ ސިއްހީ ހާލުކޮޅު އިއްޔެއިން ފެށިގެން ކަންބޮޑުވާ މިންވަރަށް ދަށަށް ގޮސްފައިވާ ކަމަށެވެ. އިއްޔެ ދިމާވި ކަމަކާއި ގުޅިގެން ކޮންމެ ވަގުތެއްގައި ވެސް ވެއްޓިވަޑައިގަތުމުގެ ފުރުސަތު ބޮޑު ކަމަށާއި ކައިރީގައި އަބަދު ވެސް މީހަކު ހުރުމަށް އީއެންޓި ޑޮކްޓަރު ލަފާ ދީފައިވާ ކަމަށް ފައިސަލު ވިދާޅުވެފައިވެއެވެ.
ރައީސް މައުމޫންގެ ހާލުކޮޅު ގޯސްވެފައިވާތީ އެމަނިކުފާނު ގެއަށް ބަދަލު ކުރުމަށް ފައިސަލް ގޮވާލައްވާފައި ވާއިރު އާއިލާއިން ވެސް މައުމޫނުގެ ހާލު ކޮޅުގޯސް ކަމަށް ބުނެ ކަންބޮޑުވުން ފާޅު ކުރައްވާފައި ވެއެވެ.
މައުމޫން ހައްޔަރު ކޮށްފައިވަނީ ފެބުރުވަރީ މަހުގެ 1 ވަނަ ދުވަހުގެ ހުކުމާއި ގުޅިގެން ސަރުކާރުން އިއުލާނުކުރި ކުއްލި ނުރައްކަލުގެ ހާލަތުގެ ދަށުން 2018 ފެބުރުވަރީ 5 ވަނަ ދުވަހުގެ މެންދަމުގެ ވަގުތެއްގައި އެމަނިކުފާނުގެ އަނބިކަނބަލުންގެ ގެކޮޅު ކަމަށްވާ އެންދެރިމާގޭގައި ހުންނަވަނިކޮށެވެ.
