ކުރީގެ ރައީސް މައުމޫން އަބްދުލްގައްޔޫމުގެ މައްޗަށް ދައުލަތުން އުފުލާފައިވާ ޓެރަރިޒަމްގެ ދައުވާއާއި ގުޅިގެން ވަކީލަކު އައްޔަންކުރުމަށް ދެެ ދުވަސް ދީފި އެވެ.
ރައީސް މައުމޫނަށްދެ ދުވަހުގެ ފުރުސަތެއް މިއަދު ބޭއްވި އަޑުއެހުމުގައި ދީފައިވާއިރު ވަކީލަކު އައްޔަންކުރަން ގާނޫނުގައި ބުނާ އެންމެ ދިގު މުއްދަތު ކަމަށްވާ ދިހަ ދުވަސް ދެއްވުމަށްވެސް އެދިވަޑައިގެންނެވި އެވެ.
ރައީސް މައުމޫން މިއަދުވެސް ޝަރީއަތުގައި ވިދާޅުވީ ދައުލަތުގެ ދައުވާގައި ބުނާ ފަދަ އެއްވެސް ކުށެއް އެމަނިކުފާނު ކުރައްވާފައި ނުވާނެ ކަމަށާއި އެހެންކަމުން އެންމެ ރަނގަޅު ގޮތަކީ އެމަނިކުފާނު ދޫކޮށްލުން ކަމަށެެވެ. އެމަނިކުފާނަކީ އުމުރުން ދުވަސްވީ ބޭފުޅަކަށްވާތީ ދިމާވެދާނެ ސިއްހީ ކުއްލި ނުރައްކަލެއްގެ ސަބަބުން ރައީސް މައުމޫން ވަނީ ގޭބަންދަށް ބަދަލުކޮށްދިނުމަށް މިއަދުވެސް ތަކުރާރުކޮށް އެދިވަޑައިގެންފަ އެވެ. ނަމަވެސް ގާޒީ ހައިލަމް ސީދާ އެކަމަށް ޖަވާބެއް ދިނުމުގެ ބަދަލުގައި ވިދާޅުވީ ރައީސް މައުމޫންގެ އުމުރުފުޅާއި ސިއްހީ ހާލުކޮޅަށް ބެލުމަށްފަހު ޖަލުގައި މިހާރުވެސް ރައީސް މައުމޫނާ މެދު އަމަލުކުރަނީ ހާއްސަ އުސޫލަކުން ކަމަށެވެ.
އެމަނިކުފާނުގެ މައްޗަށް ކުރާ ޓެރަރިޒަމްގެ ދައުވާގައި ފަނޑިޔާރުންނަށް ނުފޫޒު ފޯރުވައި މެންބަރު އިލްހާމް އަހުމަދާއި މެންބަރު އަބްދުﷲ ސިނާނަށް ރިޝްވަތު ދިން ކަމަށް ތުހުމަތުކޮށްފައިވެއެވެ.
ރައީސް މައުމޫންގެ މައްޗަށް ޓެރަރިޒަމްގެ ދައުވާގެ އިތުރުން އަދުލު އިންސާފު ގާއިމު ކުރަން ހުރަސް އެޅުމުގެ ދައުވާ ވެސް ދަނީ ކުރަމުންނެވެ.
