ސްޕެނިޝް ކޮޕަ ޑެލް ރޭ ފައިނަލުގައި ރޭ ސެވިއްޔާ ބޮޑު ތަފާތަކުން ބަލިކޮށް މުބާރާތުގެ ތަށި ޖެހިޖެހިގެން ހަތަރު ވަނަ ފަހަރަށް ބާސެލޯނާ ހޯދާއިފިއެވެ.
ރޭ ކުޅުނު ފައިނަލް މެޗު ބާސެލޯނާއިން ކާމިޔާބުކޮށްފައިވަނީ 5-0 ލަނޑުގެ ބޮޑު ތަފާތަކުންނެވެ.
މިއީ އެ ޓީމުން މި މުބާރާތް ކާމިޔާބުކުރި 30 ވަނަ ފަހަރެވެ.އަދި މިއީ ބާސެލޯނާ އިން ޖެހިޖެހިގެން ކޮޕަ ޑެލް ރޭ ކާމިޔާބުކުރި ހަތަރު ވަނަ ފަހަރެވެ. އެންމެ ފަހުން ޖެހިޖެހިގެން ހަތަރު ފަހަރު ކޮޕަ ޑެލް ރޭ ހޯދީ 1930 ވަނަ އަހަރު އެތުލެޓިކް ބިލްބާއޯ އެވެ.
ބާސެލޯނާގެ ފަރާތުން ވަރުގަދަ ކުޅުމެއް ފެނިގެންދިޔަ މި މެޗުގައި ބާސެލޯނާގެ ލުއިޒް ސުއަރޭޒް ދެ ލަނޑު ޖަހާފައިވާއިރު މެސީ، އިނިއެސްޓާ އަދި ކުޓީނިއޯ ވަނީ ކޮންމެ ކުޅުންތެރިއަކަށް އެތް ލަނޑު ޖަހާފައެވެ.
ރޭގެ މެޗުގެ މޮޅު ކުޅުންތެރިޔަކީ ބާސެލޯނާގެ ކެޕްޓަން އުމުރުން 33 އަހަރުގެ އިނިއެސްޓާ އެވެ. މި ސީޒަނަކީ އިނިއެސްޓާ ބާސެލޯނާ އަށް ކުޅޭ ފަހު އަހަރު ކަމަށް މީޑިއާ ރިޕޯޓްތައް ބުނެ އެވެ. އިނިއެސްޓާ ވެސް ވަނީ މިއީ އޭނާ ބާސެލޯނާ އަށް ކުޅޭ ފަހު ފައިނަލަށް ވުމުގެ ފުރުސަތު ބޮޑު ކަމަށް ބުނެފަ އެވެ.
ސްޕެނިޝް ކަޕްގެ ތަށި ބާސާއިން އުފުލާލާފައިވާއިރު ބާސާއަށް ލީގު ކާމިޔާބުކުރުމަށް މިހާރު ބޭނުން ވަނީ އެންމެ މޮޅެކެވެ.
