ރާއްޖޭގައި ފުރަތަމަ ފަހަރަށް ޑޮކްޓަރުކަން ކިޔެވުމުގެ ފުރުސަތު ގައުމީ ޔުނިވާސިޓީ (އެމްއެންޔޫ) އިން ހުޅުވާލައިފިއެވެ.
މި ކޯހުގައި ބައިވެރިވުމުގެ ފުރުސަތު ހުޅުވާލައިފައި ވަނީ މިމަހުގެ 22 ވާ އާދިއްތަ ދުވަހުން ފެށިގެން މިއަހަރުގެ ޖޫން މަހުގެ 14ވާ ބުރާސްފަތި ދުވަހުގެ ނިޔަލަށެވެ.
އެމްއެންޔޫއިން ބުނީ މި ކޯހުގައި ބައިވެރިވުމަށް ޖީސީއީ އޭލެވެލްއިން ތިން މާއްދާ އާއި އޯލެވެލްއިން ފަސް މާއްދާއިން މަދުވެގެން ފާސްވާން ޖެހޭކަމަށާއި، ފާސްވެފައިވާ މާއްދާތަކުގެ ތެރޭގައި ކެމިސްޓްރީ، ބަޔަލޮޖީ، ފިޒިކްސް، އަދި ހިސާބާއި އިނގިރޭސި މާއްދާ ހިމެނެން ޖެހޭނޭ ކަމަށް އެމްއެންޔޫއިން ހާމަކުރެއެވެ.
މި ކޯސް ހިންގުމަށް ހަމަޖެހިފައިވަނީ، ފުލް ޓައިމްކޮށް ފަސް އަހަރު ދުވަހުގެ މުއްދަތަކަށް ބަހާލައިގެންނެވެ.
އަދި މި ކޯހަށް ޖުމްލަ 50 ޖާގަ ހުޅުވާލާފައި ވާއިރު، އެމްއެންޔޫއިން ބުނީ ފުރުސަތު ދޭނީ ޝަރުތު ހަމަވާ ފަރާތްތަކުގެ ތެރެއިން ފުރަތަމަ ހުށަހަޅާ 50 ދަރިވަރުންނަށް ކަމަށެވެ.
