އެލްޖީއޭއިން ގދ. ދެއްވަދޫ ކައުންސިލްގެ ރައީސް އަދި ނައިބް ރައީސް ސަސްޕެންޑް ކޮށްފިއެވެ.
ލޯކަލް ގަވަރމެންޓް އޮތޯރިޓީ، އެލްޖީއޭއިން ގދ. ދެއްވަދޫ ކައުންސިލްގެ ރައީސް އަޙުމަދު ނަޖްމީން އާއި ނައިބް ރައީސް އިބްރާހީމް ތައުފީޤް، މުސާރަ އާއި ޢިނާޔަތްތައް ނުލިބޭ ގޮތަށް 1 މަސް ދުވަހަށް ސަސްޕެންޑް ކޮށްފައިވަނީ މި އަހަރު ފެބްރުއަރީ މަހުގެ 1 ވަނަ ދުވަހު ސުޕްރީމް ކޯޓުން ނެރުނު އަމުރު ތަންފީޒް ކުރުމަށް ސަރުކާރަށް ގޮވާލާ ބަޔާނެއް ނެރުމުންނެވެ. މި ދެ މެމްބަރުން ސަސްޕެންޑް ކޮށްފައިވަނީ 1 މަސް ދުވަހަށެވެ.
އިއްޔެ އެލްޖީއޭ އިން ވަނީ ޅ.އަތޮޅު ކައުންސިލްގެ 2 މެމްބަރަކު ވެސް ސަސްޕެންޑް ކޮށްފައެވެ. އެ 2 މެމްބަރުންވެސް ސަސްޕެންޑް ކޮށްފައިވަނީ ހަމަ އެފަދަ ބަޔާނެއް ނެރުމުގެ ސަބަބުން ކަމަށް އެލްޖީއޭ އިން ބުނެއެވެ. އެ ދެ މެމްބަރުން ސަސްޕެންޑް ކޮށްފައިވަނީ 6 މަސް ދުވަހަށެވެ.
އެލްޖީއޭގެ ސަސްޕެންޑް ލިސްޓަށް އެންމެ ފަހަށް ގދ. ދެއްވަދޫ 2 ކައުންސިލް މެމްބަރުން އިތުރުވި އިރު، މިހާތަނަށް މިވަނީ 11 ކައުންސިލެއްގެ 25 މެމްބަރުން މި ލިސްޓްގައި ހިމެނިފައެވެ. މީގެ ތެރޭގައި އައްޑޫ ސިޓީ މޭޔަރާއު ޑެޕިއުޓީ މޭޔަރު އަދި އިތުރު މެމްބަރަކު ހިމެނޭކަން ވެސް ފާހަގަ ކުރެވެއެވެ.
