އެއްހަފްތާގެ ތެރޭގައި ދައުލަތަށް 74 މިލިއަނަށް ވުރެ ގިނަ ރުފިޔާ ދައްކަން ކުރީގެ ނައިބު ރައީސް އަހްމަދު އަދީބު އަބްދުލް ޣަފޫރަށް ފިނޭންސް މިނިސްޓްރީ އިން އަންގައިފިއެވެ.
އަދީބު އަތުން ފައިސާ ހޯދުމަށް އެ މިނިސްޓްރީން އެންގީ އެންޓި ކޮރަޕްޝަންސް ކޮމިޝަނުން އެކުލަވާލާފައިވާ ރިޕޯޓަކާ ގުޅިގެން ކަމަށާއި އެއީ ނަސަންދުރަ ޕެލަސް ހޮޓެލް އެންޕީއެޗް އިންވެސްޓުމެންޓަށް ދިން މައްސަލައިގައި ކަމަށް މައުލޫމާތު ލިބެއެވެ.
އެ ފައިސާ މާޗް މަހުގެ 28 ވަނަ ދުވަހުން ފަށައިގެން ހަތް ދުވަސް ތެރޭ ދައުލަތައް ދައްކައި ޚަލާސް ކުރަން އަދީބަށް އަންގައި އެކަން ސިޓީއަކުން އަދީބުގެ އާއިލާއަށް މިހާރުވަނީ ފޮނުވާފައެވެ. އެ ސިޓީގައި ބުނެފައިވާގޮތުން އަދީބު ދައުލަތަށް ދައްކަވަންޖެހެނީ ނަސަންދުރާ ތަރައްގީ ކުރަން ހަވާލުކޮށްފައިވާ ކުންފުންޏަށް އެ ތަން ތަރައްގީކުރަން ދިން މުއްދަތު ގަވާއިދާ ޚިލާފަށް 50 އަހަރަށް އިތުރުކޮށްދީފައިވާ މައްސަލައާ ގުޅިގެން ދައްކަވަންޖެހޭ ފައިސާއެވެ.
އަދީބަށް ފޮނުވި މިސިޓީ މިހާރުވަނީ މީސް މީޑިއާގައި އާންމުވެފައެވެ.
ކަނޑައެޅިފައިވާ މުއްދަތުގެ ތެރޭގައި އަދީބު ފައިސާ ނުދައްކައިފިނަމަ އެ މައްސަލަ ދައުލަތުގެ މާލިއްޔަތުގެ ގާނޫނުގެ ދަށުން ފިޔަވަޅު އެޅުމަށް އެޓާނީ ޖެނަރަލްގެ އޮފީހަށް ފޮނުވާނެ އެވެ.
ނަސަންދުރަ ކުއްޔަށް ދިނުމުގައި އަދީބު ހިޔާނާތްތެރިވެފައިވާ މައްސަލައެއްގައި ވަނީ ކްރިމިނަލް ކޯޓުގައި ޖިނާޢީ ދައުވާއެއް ވެސް އުފުލާފައެވެ.
