ކޮކާ- ކޯލާ ބޮއެގެން ވޯލްޑް ކަޕް ބަލަން ދިއުމުގެ ފުރުސަތު ހުޅުވާލައިފިއެވެ.
“ކޮކާ-ކޯލާ ވޯލްޑް ކަޕް ފިއެސްޓާ” ގެ ނަމުގައި ފެށި މި ޕްރޮމޯޝަން ރަސްމީކޮށް ފަށާފައިވަނީ އިއްޔެގައެވެ.
މި ޕްރޮމޯޝަން ފައްޓަވައި ދެއްވައި “ކިކްއޯފް” ކޮށްދެއްވީ ޔޫތު މިނިސްޓަރު އިރުތިޝާމް އާދަމް އެވެ.
“ކޮކާ-ކޯލާ ވޯލްޑް ކަޕް ފިއެސްޓާ” ޕްރޮމޯޝަނުގައި ރަން ކުލައިގެ މަތިގަނޑު ޖެހި ކޮކާ- ކޯލާގެ ފުޅީގެ މަތިގަނޑުގެ ދަށުގައި އިންނަ ނަމްބަރު “2626” އަށް މެސެޖުކޮށްގެން ޕްރޮމޯޝަންގައި ބައިވެރިވެވޭނެ އެވެ.
އިއްޔެއިން ފެށިގެން 45 ދުވަހަށް ކުރިއަށް ގެންދާ މި ޕްރޮމޯޝަނުގައި ޮންމެ ހަފުތާއަކު “ގްރޭޑް ޕްރައިޒް”ގެ ގޮތުގައި ވަނަ އެއް ހޮވައި އެ މީހަކަށް އިތުރު މީހަކާއެކު ރަޝިއާއަށް ދިއުމުގެ ފުރުސަތު ލިބޭނެ އެވެ. މި ދަތުރުގައި ރަޝިއާގައި ހަތަރު ދުވަސް ހޭދަ ކޮށްލުމުގެ ނަސީބު ލިބޭނެ އެވެ.
މި ޕްރޮމޯޝަންގެ ދަށުން ރަޝިއާއަށް ދާ މީހުންގެ ހުރިހާ ހަރަދެއް ދޭނީ ކޮކާކޯލާ ކުންފުނިންނެވެ.
މި ޕްރޮމޯޝަން ފައްޓަވައި ދެއްވަމުން ކޮކާ-ކޯލާގެ ޖެނެރަލް މެނޭޖަރު ނިލެން ދެރަސާރިއާ ވިދާޅުވީ ނަސީބުވެރިޔާ އަށް އިތުރު މީހަކު ގެންދިއުމުގެ ފުރުސަތު އޮންނާނެ ކަމަށާއި އިތުރު މީހަކު ގެންދިއުމުގެ ފުރުސަތު ދެނީ މި ޕްރޮމޯޝަންގައި އެންމެ އެކްޓިވްކޮށް އުޅެނީ އަންހެން ބޭފުޅުންކަމަށްވާތީ އެ ބޭފުޅުންނާއެކު އިތުރު ފަރާތެއް ދަތުރު ކުރަން ފުރުސަތު ދޭން ވެގެން ކަމަށެވެ،
“ކޮކާ-ކޯލާ ވޯލްޑް ކަޕް ފިއެސްޓާ ޕްރޮމޯޝަން” ގައި 300 އެމްއެލް އާއި 500 އެމްއެލް އަދި 1250 އެމްއެލްގެ ފުޅި ގަނެގެންވެސް ބައިވެރިވެވޭނެ އެވެ.
