އައްޑޫސިޓީގައި އެޅުމަށް ހަމަޖެހިފައިވާ ޕޮލިސް އެކެޑަމީގެ ބިންގާ މިއަދު އެޅުމަށް ހަމަޖެހިފައި އޮތް ނަމަވެސް އެ ތާރީޚް ފަސްކޮށްފިއެވެ. ސައުތުޕޮލިސް ޑިވިޝަން ކޮމާންޑަރ ޗީފްއިންސްޕެކްޓަރއޮފް ޕޮލިސް އަލީ ޝަރީފް ވިދާޅުވީ އެތަނުގެ ބިންގާ އެޅުމަށް ހަމަޖެހިފައިވަނީ މިއަދު ހަވީރު 4:30 ގައި ނަމަވެސް މިހާރު މި ރަސްމިއްޔާތު ވަނީ ފަސްކޮށްފައި ކަމަށެވެ. އަދި ތާރީޚާއި ގަޑި ފަހުން އިއުލާން ކުރައްވާނެ ކަމަށް އަލީޝަރީފް ވިދާޅުވިއެވެ. މި އިމާރާތުގެ ބިންގާ އަޅުއްވައި ދެއްވުމަށް ހަމަޖެހިފައި އޮތީ ހޯމް މިނިސްޓަރ އަޒުލީން އަޙުމަދާއި، އިންޑިއާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު އަކިލޭޝް މިޝްރާއި، ކޮމިޝަނަރއޮފް ޕޮލިސް އަޙުމަދު އަރީފެވެ. އާރުއޭފް ސަރަހައްދުގައި ހަދާފައިވާ މިއިމާރާތް އަޅަނީ ގާތްގަނޑަށް އެއްކިލޯމީޓަރުގެ ބިމެއްގައެވެ. އެބިމަކީ ހަނިކޮށް ދިގުކޮށް އޮންނަ ބިމެކެވެ. މައުލޫމާތު ލިބިފައިވާ ގޮތުގައި އެސަރަހައްދުން ފުއްޓަރާވީ ކޮޅަށް ބިންހިއްކާ ގޮތަށްވަނީ ހަމަޖެހިފައެވެ. އިންޑިއާ ސަރުކާރުގެ ހިލޭ އެހީގެ ދަށުން 18 މިލިއަން ރުފިޔާ ޚަރަދުކޮށްގެން އިމާރާތް ކުރާ މިތަނަކީ ރާއްޖޭގައި އިމާރާތްކުރާ މިފަދަ އެންމެ އިމާރާތް ކަމަށްވެސް މައުލޫމާތު ލިބިފައިވެއެވެ. މިއީ ޒަމާނީ ފެންވަރުގެ ޚިދުމަތް ލިބޭގޮތަށް އިމާރާތްކުރާ ތަނެކެވެ.
