ސްލޮވާކިއާގެ އިންވެސްޓިގޭޓިވް ޖާނަލިސްޓް ޖޭން ކުސިއަކްއާއި އޭނާގެ ލޯބިވެރިއާގެ މަރާ ގުޅިގެން ހައްޔަރުކުރި 7 މީހުން ދޫކޮށްލައިފިއެވެ.
އެ މީހުން ދޫކޮށްލިކަން އެ ގައުމުގެ ފުލުހުންގެ ތަރުޖަމާނު ވަނީ ކަށަވަރު ކޮށްދެއްވައިފައެވެ.
ފުލުހުންގެ ތަރުޖަމާނު ޑެނިސާ ބަލޯވާ، މިއަދު ދެއްވި ބަޔާނެއްގައި ވިދާޅުވެފައިވަނީ ގާނޫނު ތަންދޭ ގޮތުގެ މަތިން، ތަހުގީގީ މަރުހަލާގެ 48 ގަޑި އިރަށް ފަހު އެ 7 މީހުން ވެސް ދޫކޮށްލާފައިވާ ކަމަށެވެ.
ނޫސްވެރިޔާ ޖޭން މަރުވިއިރު އޭނާ ދިޔައީ މާފިޔާއާ ގުޅުން ހުރިކަމަށް ޝައްކު ކުރެވޭ އިޓަލީގެ ވިޔަފާރިވެރިން ތަކަކާ ބެހޭގޮތުން ދިރާސާކޮށް ރިޕޯޓެއް ތައްޔާރު ކުރަމުންނެވެ. ޖޭން އާއި އޭނާގެ ލޯބިވެރިއާ މާޓިނާ މަރާލާފައި ތިއްބާ ފެނިފައިވަނީ ސްލޮވާކިއާގައި އެމީހުން ދިރިއުޅުނު އެޕާޓްމެންޓް ތެރެއިން މިދިޔަ ފެބްރުއަރީ މަހު 26 ވަނަ ދުވަހުއެވެ.
އެ ދެމީހުންގެ މަރާ ގުޅިގެން ފުލުހުން ހިންގި ހާއްސަ އޮޕަރޭޝަނެއްގެ ދަށުން ހައްޔަރު ކުރި 7 މީހުންނަކީ އޭނާ ކުރަމުން އައި ދިރާސާއާ ގުޅުން ހުރި ބައެއްކަމަށް ފުލުހުން ތުހުމަތުކޮށްފައި ވެއެވެ.
ތަހުގީގަށްފަހު އެ 7 މީހުން ދޫކޮށްފައިވި ނަމަވެސް ޖޭން އާއި މާޓިނާގެ މަރުގެ މައްސަލައިގެ ތަހުގީގު ސްލޮވާކިއާ ސަރުކާރުން ދަނީ ވަރަށް ސީރިއަސްކޮށް ކުރަމުންނެވެ.
