ކުރީގެ ރައީސް މުހައްމަދު ނަޝީދުގެ ވެރިކަމުގައި ބަދަލު ދޭ ގޮތަށް ސަރުކާރަށް ނަގާފައިވާ ބިންތައް އެ ބިންތަކުގެ ވެރިފަރާތްތަކާއި ހަވާލުކުރާނެ ކަމަށް އިކޮނޮމިކް މިނިސްޓަރު މުހައްމަދު ސައީދު ވިދާޅުވެއްޖެ އެވެ
އިއްޔެ ހަވީރު ހިތަދޫ ސްޓޭޑިއަމް ސަރަހައްދުގައި “މަގެ ގައުމާ މަގޭ ދީނާ ނުކުޅެއްޗޭ” ގެ ނަމުގައި ބޭއްވި ހަރަކާތުގައި ވާހަކަދައްކަވަމުން ސައީދު ވިދާޅުވީ ނަޝީދުގެ ވެރިކަމުގައި ރައްޔިތުންގެ އަތުން ނެގި ބިންތައް ހަވާލުކޮށް ދޭން ނިންމާފައިވާ ވާހަކަ ހައުސިން މިނިސްޓަރު ޑރ. މުހައްމަދު މުއިއްޒު ގުޅުއްވާފައި ވިދާޅުވި ކަމަށާއި އަދި އެ ބިންތައް ދުރު ނޫން މުސްތަގުބަލެއްގައި ރައްޔިތުންނަށް ހަވާލުކޮށް ދޭނެ ކަމަށެވެ. މީގެ އިތުރުން ސައީދު ވިދާޅުވީ އެކަމާ ގުޅޭ އުސޫލު ވަރަށް އަވަހަށް ސަރުކާރުން އިއުލާން ކުރާނެ ކަމަށެވެ
ކުރީގެ ރައީސް މައުމޫން އަބްދުލް ގައްޔޫމްގެ ވެރިކަމުގައި ހިތަދޫ މާމެންދޫ ސަރަހައްދުން ދިރިއުޅުމަށް ދޫކޮށްފައިވާ ބައެއް ގޯތިތައް ބަދަލު ދޭ ގޮތަށް ސަރުކާރަށް ނެގީ، ނަޝީދުގެ ވެރިކަމުގައި 2011 ވަނަ އަހަރު ސާކް ސަމިޓް ބާއްވަން އިކުއެޓޯރިއަލް ކޮންވެންޝަން ސެންޓަރު (އީސީސީ) އިމާރާތް ކުރުމަށެވެ.އޭރު އެ ބިންތައް ނަގައި، އެ ސަރަހައްދަކީ މީހުން ދިރިނޫޅޭ ފަޅު ރަށެއްގެ ގޮތުގައި ވެސް ސަރުކާރުން ކަނޑައެޅި އެވެ