ފަތުރުވެރިކަމުގެ ދާއިރާއިން ދުނިޔޭގެ އެންމެ ނުފޫޒުގަދަ އެޗްއާރު މައިންޑްގެ އެވޯޑު ފުރަތަމަ ފަހަރަށް ރާއްޖޭގެ އަންހެން ކަނބަލަކު ހޯދައިފިއެވެ.
އަމިއްލަފުށި އެންޑް ފިނޮޅުގައި ހިއުމަން ރިސޯސް ޑިރެކްޓަރ އެއްގެ މަގާމުގައި ހުންނެވި އާމިނަތު ޝާލިޔާ ވަނީ ފަތުރުވެރިކަމުގެ ދާއިރާއިން ” 100 ޓޮޕް ގްލޯބަލް އެޗް އާރު މައިންޑްސް” ގެ އެވޯޑް ހޯއްދަވާފައެވެ.
ފެބްރުއަރީ 15 އިން 17 އަށް، މުމްބާއީގެ ތާޖް ހޮޓަލުގައި ކުރިއަށް ގެންދިޔަ ދުނިޔޭގެ އެޗްއާރުޑީ ކޮންފަރެންސްގައި ޝާލީގެ އިތުރުން ރާއްޖޭގެ ފިރިހެން 2 ބޭފުޅަކުވެސް ވަނީ މި އެވޯޑު ހާސިލް ކުރައްވަވާފައެވެ.
ފަތުރުވެރިކަމުގެ ދާއިރާގައި 17 އަހަރު ޚިދުމަތް ކޮށްފައިވާ ޝާލީ އަކީ މި މަގާމު ރާއްޖެއިން ހާސިލް ކުރެއްވެވި ފުރަތަމަ އަންހެން ބޭފުޅާއެވެ. ” 100 ޓޮޕް ގްލޯބަލް އެޗް އާރު މައިންޑްސް” ގެ ކެޓަގަރީން މިއަހަރު އެވޯޑު ހޯއްދެވިއިރު ޝާލީ ވަނީ މިދިޔަ އަހަރު ދުނިޔޭގެ އެންމެ ނުފޫޒުގަދަ 100 އެޗްއާރުންގެ އެވޯޑުވެސް ހާސިލްކުރައްވަވާފައެވެ. ޝާލީއަކީ މި ދެ އެވޯޑުވެސް މިހާތަނަށް ރާއްޖޭން ހޯއްދެވި އަންހެން އެޗްއާރެވެ.
ޔޫކޭގެ ކާޑިފް މެޓްރޯ ޕޮލިޓަން ޔުނިވަރސިޓީން އެޗްއާރު މެނޭޖްމަންޓު އެމްބީއޭ ހާސިލްކުރައްވަވާފައިވާ ޝާލީވަނީ ރާއްޖޭގެ ރިސޯޓުތަކުގެ އިތުރުން ދުބާއީގައި ވެސް މަސައްކަތް ކޮށް މިދާއިރާއިން ތަޖުރިބާ ހޯއްދަވާފައެވެ.
އާދައިގެ އެޗްއާރު ސްޓާފެއްގެ ގޮތުގައި ފަތުރުވެރިކަމުގެ ދާއިރާއާއި ގުޅިލެއްވެވި ޝާލީ ވަނީ އެޗްއާރުގެ ތަފާތު އެކި މގާމުތައް ފުރުއްވަވައި ދާއިރާގައި ކުރިއަށް ދިއުމުގައި ކާމިޔާބު ކުރައްވަވާފައެވެ.
ޝާލީ އަކީ އައްޑޫސިޓީގެ މޭޔަރ އަބްދުﷲ ޞާދިގުގެ ކޮއްކޯފުޅު ޟިރާރު މުޙައްމަދުގެ އަނބިކަނބަލުންނެވެ. ޝާލީ ވަނީ އުފާވެރި އާއިލާއެއްގެ ހިއްސާއެއްގެ ގޮތުގައި ހުންނަވައިގެންވެސް ފަތުރުވެރިކަމުގެ ދާއިރާގައި އަންހެން ބޭުފުޅުންނަށް ވެސް ކާމިޔާބު ހާސިލްކޮށް މަތީފަޑީގައި މަސައްކަތް ކުރެވިދާނެ ކަމުގެ ނަމޫނާ މިސާލެއް ދައްކުވައިދެއްވާފައެވެ.
