ފެބްރުއަރީ 16 ވާ ހުކުރު ދުވަހު އައްޑޫސިޓީގައި ބޭއްވުމަށް ހަމަޖެހިފައިވާ ޕީޕީއެމްގެ ޚާއްޞަ އިވެންޓަކަށް ރައީސުލް ޖުމުހޫރިއްޔާގެ އަނބިކަނބަލުން މެޑަމް ފާތުން ވަޑައިގަންނަވާނެ ކަމަށް ޕީޕީއެމުން ބުނެފިއެވެ.
ޕީޕީއެމުގެ އައްޑޫ އޮފިޝަލަކު ވިދާޅުވީ ހުކުރުދުވަހުގެ ރޭ އައްޑޫގައި އެ ޕާޓީގެ ބޮޑު އިވެންޓެއް ބޭއްވުމަށް ހަމަޖެހިފައިވާ ކަމަށެވެ.
“މި އިވެންޓަށް ޕާޓީގެ އިސްވެރިން ވަޑައިގަންނަވާ ގޮތަށް އޮތީ. ފަހަރެއްގައި ރައީސް ވެސް ބައިވެރިވެ ވަޑައިގަތުން އެކަށީގެންވޭ. މެޑަމް ވަޑައިގަންނަވާ ގޮތަށް ހަމަޖެހިފައި އޮތީ” އޮފިޝަލް ވިދާޅުވިއެވެ.
ރާއްޖޭގެ ސިޔާސީ މަސްރަޙް ހަލަބޮލި ވެފައިވާ މިދަނޑިވަޅުގައި ޕީޕީއެމުން އައްޑޫގައި ބާއްވާ މި އިވެންޓަށް މެޑަމް ފާތުން އައްޑޫއަށް ވަޑައިގަންނަވާއިރު މިދިޔަ އަހަރުގެ އޮކްޓޯބަރ މަހުގައި ވެސް މެޑަމް ފާތުން ވަނީ އައްޑޫއަށް ޒިޔާރަތް ކުރައްވަވާފައެވެ.
“އެންމެ ގާތުން” ގެ ނަމުގައި އަތޮޅު ތެރޭގައި ދިރިއުޅޭ ރައްޔިތުންނާ ބައްދަލުކުރެއްވުމަށް މެޑަމް ފާތުން ހިންގަވާ ކެމްޕެއިންގެ ދަށުން އައްޑޫސިޓީއަށް ކުރެއްވެވި މި ދަތުރުފުޅުގައި އައްޑޫން އެކަމަނާއަށް ވަނީ ހޫނު ތަރުހީބެއް ލިބިވަޑައިގެންފައެވެ.
