ވިލާ ކޮލެޖުގެ ދަސްވެނިވުމުގެ ހަފްލާގައި، އެ ކޮލެޖުގެ އެކި ޕްރޮގުރާމުތައް ފުރިހަމަކުރި 1،237 ދަރިވަރުން މިއަހަރު ދަސްވެނިވާނެ ކަމަށް އެކޮލެޖުން ބުނެފިއެވެ. . އޭގެ ތެރެއިން 70 ޕަސެންޓަކީ އަންހެން ދަރިވަރުންނެވެ.
އެ ކޮލެޖުން ބުނީ މިއަހަރު ދަސްވެނިވާ ދަރިވަރުންގެ 60 ޕަސެންޓަކީ ވިލާ ކޮލެޖުގެ އަމިއްލަ ޕްރޮގްރާމްތައް ފުރިހަމަކުރި ދަރިވަރުން ކަމަށެވެ. ކޮލެޖުގެ ދަސްވެނިވުމުގެ ހަފްލާގެ ފުރަތަމަ ދުވަސް ހާއްސަކޮށްފައި ވަނީ ވެސް އެ ޕްރޮގުރާމުތައް ފުރިހަމަކުރި ދަރިވަރުންނަށެވެ.
ތަފާތު ދަންފަޅި ތަކަކަށް ބަހާލައިގެން ކުރިއަށް ގެންދިޔަ ދަސްވެނިވުމުގެ ހަފްލާގައި ރޭ އޮތީ “ވިލާ ކޮލެޖުގެ ސްޓޫޑެންޓް އެޗީވްމަންޓް އެވޯޑްސް 2026 ” ޙަފުލާ އެވެ. މި ޙަފްލާ ޝަރަފުވެރިކޮށްދެއްވީ ނައިބް ރައީސް ޙުސައިން މުޙައްމަދު ލަޠީފްއެވެ.
މި ރަސްމިއްޔާތުގައި ވާހަކަފުޅު ދައްކަވަމުން ނައިބް ރައީސް ވަނީ ދަސްވެނީންނަށް ލިބިފައިވާ ޢިލްމާއި ހުނަރުގެ އަލީގައި ޤައުމަށް ބޭނުންތެރި ދާއިރާތަކަށް އީޖާދީ ވިސްނުންތައް ހޯއްދަވައިދެއްވުމަށް އެދިވަޑައިގެންފައެވެ.
ރައީސުލްޖުމްހޫރިއްޔާގެ ނައިބުގެ ވާހަކަފުޅުގައި، ރޭގެ ޙަފުލާގައި ޝަރަފްވެރި އެވޯޑުތައް ހާޞިލްކުރި އެންމެހާ ދަސްވެނީންނަށާއި، އެ ދަސްވެނީންގެ ލޮބުވެތި ޢާއިލާތަކަށް ތަހުނިޔާއާއި މުބާރިކުބާދީ ދެންނެވިއެވެ. އެމަނިކުފާނުގެ ވާހަކަފުޅުގައި، ޤައުމާއި މުޅި މުޖުތަމަޢަށް ދިމާވެފައިހުރި މައްސަލަތައް ޙައްލުކުރުމުގައި ދަސްވެނީންގެ ސިކުނޑިތަކުން އީޖާދީ ވިސްނުން އިސްކުރަން ޖެހިފައިވާ ކަމުގައި ވިދާޅުވިއެވެ. އަދި މުޅި މުޖުތަމަޢަށް ބޭނުންވެފައިހުރި ކަންކަމަށް ދާއިމީ ޙައްލު ހޯދައިދިނުމުގައި އެބޭފުޅުންގެ ވިސްނުންތަކުގެ ބޭނުން އިންތިހާއަށް ބޮޑުކަމަށާއި އެމަގަށް މަސައްކަތް ކޮށްދެއްވާ، މުޅި މުޖުތަމަޢު އުފާ ކުރުވަނިވި ކަންތައްތަކެއް ކޮށްދެއްވާނެ ކަމަށް ޔަޤީންކުރައްވާ ކަމުގައި ވިދާޅުވިއެވެ.
މީގެއިތުރުން، މާދަމާ މަސައްކަތު މާހައުލަށް ނިކުމެ އެބޭފުޅުން ކުރާ މަސައްކަތް ވެގެންދާނީ ވަރަށް ޒިންމާދާރު، އެ މާހައުލަކާ ގުޅޭ އަދި މަސައްކަތުގެ ސްޕީޑު އަވަސް އީޖާދީ ވިސްނުންތައް އެތަންތަނަށް ހޯދައިދޭނެ މަސައްކަތަކަށް ކަމުގައި އެމަނިކުފާނުގެ ވާހަކަފުޅުގައި ސިފަކުރެއްވިއެވެ. އަދި މިކަމުގެ ނަތީޖާއެއްގެ ގޮތުން ރައްޔިތުންނާއި މުއައްސަސާތަކާ ދޭތެރޭގައި އޮންނަ އިތުބާރު ބަދަހިވެ، އިތުރަށް ފުރިހަމަ ވެގެންދާނެކަން އެމަނިކުފާނުގެ ވާހަކަފުޅުގައި ފާހަގަކުރެއްވިއެވެ.
އެމަނިކުފާނުގެ ވާހަކަފުޅުގައި، ދިވެހިރާއްޖެއަކީ ފުރިހަމައަށް ތަރައްޤީވެފައިވާ ޤައުމެއްގެ ގޮތުގައި ފެނިގެންދިޔުމަކީ އެންމެހާ ދިވެހި ރައްޔިތުންގެވެސް ވަރަށް ބޮޑު އުންމީދެއް ކަމުގައި ވިދާޅުވިއެވެ. އަދި އެ އުންމީދު ހަޤީޤަތަކަށް ހެދުމަށްޓަކައި، 2040 ވަނަ އަހަރުގެ ނިޔަލަށް ދިވެހިރާއްޖެ ފުރިހަމައަށް ތަރައްޤީވެފައިވާ ޤައުމަކަށް ހެއްދެވުމުގެ ދުރުރާސްތާ ތަޞައްވުރެއް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ކަނޑައަޅުއްވާ، އިޢުލާން ކުރައްވާފައިވާ ކަމުގައި އެމަނިކުފާނު ވިދާޅުވިއެވެ. އަދި މި ތަޞައްވުރު ހާސިލުކުރުމަށް އެންމެހާ ބޭފުޅުންގެ ބުރަ މަސައްކަތާއި އެހީތެރިކަން ބޭނުންވާ ކަމަށާއި އަދި ހާއްސަގޮތެއްގައި ޒުވާނުން އިސްނަގައިގެން، ދަސްވެނީންގެ އީޖާދީ ވިސްނުންތައް އިސްކޮށްގެން މި މަސައްކަތުގައި އަމިއްލައަށް ބައިވެރިވާނެ ކަމަށް އުންމީދު ކުރައްވާ ކަމުގައި ވިދާޅުވިއެވެ.
ރޭ ބޭއްވި ވިލާ ކޮލެޖުގެ ސްޓޫޑެންޓް އެޗީވްމަންޓް އެވޯޑްސް 2026 ޙަފުލާގައި، ޤާސިމް އިބްރާހިމް އެވޯޑް ފޮރ އެކްސެލެންސް ހާޞިލްކުރި ޕޯސްޓް ގްރެޖްއޭޓް ޕްރޮގްރާމްގެ ދަސްވެނިންނަށް އެވޯޑް ދެއްވީ ރައީސުލްޖުމްހޫރިއްޔާގެ ނައިބު އަލްއުސްތާޛު ޙުސައިން މުޙައްމަދު ލަޠީފެވެ.
