ގައުމެއްގައި އިލްމީ ރޫހެއް އުފައްދައި، ގައުމު އެއް ޖީލުން އަނެއް ޖީލަށް ނަގަހައްޓައިދިނުމުގެ އެންމެ ބޮޑު އެއް މަސްއޫލިއްޔަތެއް އަދާކުރަނީ އުނގަންނައިދިނުމުގެ ދާއިރާގެ ބޭފުޅުން ކަމަށް ފަންނާއި ސަގާފަތާއި ތަރިކައާ ބެހޭ މިނިސްޓަރު ހީނާ ވަލީދު މިއަދު ވިދާޅުވެއްޖެއެވެ.
މިނިސްޓަރު މިހެން ވިދާޅުވީ ވިލާ ކޮލެޖުގެ މިއަހަރުގެ ދަސްވެނިވުމުގެ ފުރަތަމަ ދަންފަޅި ޝަރަފުވެރިކޮށްދެއްވައި ދެއްކެވި ވާހަކަފުޅުގައެވެ.
މިނިސްޓަރު ހީނާ ފާހަގަކުރެއްވި ގޮތުގައި، ގައުމެއްގައި ފިކުރީ ވިސްނުންތަކެއް އާލާކޮށް އިލްމީ ރޫހެއް ބިނާކުރެވެނީ އެ ގައުމެއްގެ ތަރުބަވީ އަދި ތައުލީމީ ނިޒާމުގެ ތެރެއިންނެވެ. އެހެންކަމުން، އީޖާދީ އަދި ފިކުރީ ވިސްނުންތަކެއްގެ މަތީގައި ގައުމު ދެމެހެއްޓުމުގެ މައިގަނޑު ޒިންމާ އޮތީ ތަރުބިއްޔަތު ކުރުމާއި އުނގަންނައިދިނުމުގެ ދާއިރާގައި މަސައްކަތްކުރާ ފަރާތްތަކުގެ ކޮނޑުގައި ކަމަށް އެކަމަނާ ވިދާޅުވިއެވެ.
ހަމައެއާއެކު، މުޖުތަމައަކަށް ހަމައެކަނި ފިކުރީ ވިސްނުންތަކާއި އިލްމީ ސިކުނޑިތަކެއް އުފަންކޮށްގެން ނުފުދޭނެ ކަމަށާއި، ބޭނުންވަނީ ހަރުދަނާ އަހުލާގީ ސިފަތަކެއް ހުރި ބައެއް ކަމަށް މިނިސްޓަރު ވިދާޅުވިއެވެ. އެގޮތުން އިންސާނީ ކަރާމާތަށް ހުރުމަތްތެރިކޮށް ހިތުމާއި، އެކަކު އަނެކަކުގެ ހިޔާލަށް އިހުތިރާމްކުރުމުގެ އިތުރުން، ކޮންމެ ކަމެއްގެ ވެސް ހަގީގަތް ހޯދައި ބެލުމުގެ ތަހުޒީބީ ސިފަތައް ދަސްވެނިންގެ ކިބައިގައި ހުންނަންޖެހޭނެ ކަމަށް އެކަމަނާ ބަޔާންކުރެއްވިއެވެ.
މީގެއިތުރުން، ހާސިލުކުރި ސަނަދަކީ ހަމައެކަނި ލިޔުމެއް ނޫން ކަމަށާއި، ކިޔަވައިގެން މުޖުތަމައަށް ނުކުންނައިރު މައުލޫމާތުގެ މުއްސަނދިކަމާ އެއްވަރަށް އިލްމީ ތެދުވެރިކަމާއި ނަފުސުގެ އަހުލާގު އިސްކުރަންޖެހޭނެ ކަމަށް މިނިސްޓަރު ގޮވާލެއްވިއެވެ. އަދި ގައުމުގެ އިޖުތިމާއީ ފޭރާމާއި އަހުލާގީ މިންގަނޑު ހަމަމަގަށް އަޅުވައި، މި ހާލަތު ބަދަލުކުރުމަށް އިސްނަގާ ބަޔަކަށް ވުމަށް ވެސް ދަސްވެނިންނަށް އިލްތިމާސްކުރެއްވިއެވެ.
ވިލާ ކޮލެޖުގެ މިއަހަރުގެ ދަސްވެނިވުމުގެ ފުރަތަމަ ދަންފަޅީގައި، ހިންގުމުގެ ދާއިރާއިންނާއި އުނގަންނައިދިނުމުގެ ދާއިރާއިން ޖުމްލަ 201 ދަރިވަރަކު ވަނީ ސަނަދު ހާސިލުކޮށްފައެވެ.
