ދިވެހި މުޖުތަމައުގެ އާންމު އިޖުތިމާއީ އަދި އަހުލާގީ މިންގަނޑުތަކާ ހިލާފަށް، ނިވާކަން ކުޑަކޮށް ހެދުން އަޅައިގެން މަގުމައްޗާއި އާންމު ތަންތަނުގައި އުޅޭ ބިދޭސީންނާމެދު ގާނޫނީ ހަރުކަށި ފިޔަވަޅު އަޅާނެ ކަމުގެ އިންޒާރު މޯލްޑިވްސް ޕޮލިސް ސާވިސްއިން ދީފިއެވެ.
ފުލުހުން ނެރުނު ބަޔާނެއްގައި ބުނީ، ރާއްޖޭގައި ދިރިއުޅޭ ބައެއް ބިދޭސީން އާންމު އިޖުތިމާއީ މިންގަނޑުތަކާ ހިލާފަށް ނިވާކަން ކުޑަކޮށް ހެދުން އަޅައިގެން މަގުމައްޗާއި އެހެނިހެން އާންމު ތަންތަނުގައި އުޅޭކަން މިހާރަކަށް އައިސް ފާހަގަކުރެވިފައިވާ ކަމަށެވެ. މިއީ މުޖުތަމައުގެ އާންމު ސުލޫކީ މިންގަނޑުތަކާ ފުށުއަރާ، އަދި މުޖުތަމައުގެ ސުލްހަ މަސަލަސްކަމާއި އަމާންކަމަށް ނޭދެވޭ އަސަރުކޮށްފާނެ ކަމެއް ކަމަށް ފުލުހުން ބުންޏެވެ. އެހެންކަމުން އެފަދަ ހާލަތެއް ކުރިމަތިވުމުގެ ކުރިން، އާންމު އިޖުތިމާއީ މިންގަނޑުތަކާ ހިލާފު އަމަލުތައް ހުއްޓުވުމުގެ ގާނޫނުގެ ދަށުން އަޅަންޖެހޭ ފިޔަވަޅުތައް އަޅަމުންދާނެ ކަމަށް ވަނީ ހާމަކޮށްފައެވެ.
ފުލުހުންގެ ބަޔާނުގައި ފާހަގަކޮށްފައިވާ ގޮތުގައި، ދިވެހި މުޖުތަމައުގެ އަހުލާގީ އަދި އިޖުތިމާއީ މިންގަނޑުތައް ދެމެހެއްޓުމަކީ ރާއްޖޭގައި ދިރިއުޅޭ އެންމެހައި ފަރާތްތަކުން ވެސް އަދާކުރަންޖެހޭ ގައުމީ ޒިންމާއެކެވެ. އެހެންކަމުން ރާއްޖޭގައި ދިރިއުޅޭ ބިދޭސީން ރާއްޖޭގެ ދީނީ އަދި ސަގާފީ އާދަކާދަތަކަށް އިހުތިރާމުކޮށް، އާންމު ތަންތަނުގައި އުޅޭއިރު އެ މިންގަނޑުތަކަށް ސަމާލުވުމަށް ފުލުހުން ވަނީ ހަނދާންކޮށްދީފައެވެ.
މީގެއިތުރުން، ބިދޭސީން ބަލަހައްޓާ ސްޕޮންސަރުންނާއި އެ ފަރާތްތަކާ ހަވާލުވެތިބޭ ފަރާތްތަކުން ވެސް، އެ މީހުންގެ ބެލުމުގެ ދަށުގައި ތިބޭ ބިދޭސީންގެ ކިބައިން މުޖުތަމައު ނުރުހޭ މިފަދަ އަމަލުތައް ނުފެންނާނެހެން އަމަލުތައް ބެހެއްޓުމަށް ހާއްސަ ސަމާލުކަމެއް ދިނުމަށް ފުލުހުން ވަނީ އިލްތިމާސްކޮށްފައެވެ.
ފުލުހުން އިތުރަށް ބުނީ، ފަތުރުވެރިންނަށް ހާއްސަކޮށްފައިވާ ސަރަހައްދުތައް ފިޔަވައި، އާންމު ރަށްރަށުގެ މަގުތަކާއި އާންމު ތަންތަނުގައި ފަތުރުވެރިން އުޅޭއިރު ވެސް ދިވެހި މުޖުތަމައުގެ މިންގަނޑުތަކާ އެއްގޮތަށް ހެދުން އެޅުވުމަށް ފަތުރުވެރިކަމުގެ ހިދުމަތްދޭ ފަރާތްތަކުން ބާރުއަޅަންވާނެ ކަމަށެވެ. އަދި މި އުސޫލުތަކާ ހިލާފުވާ ފަރާތްތަކާމެދު ގާނޫނުގައިވާ ގޮތުގެ މަތިން ފިޔަވަޅު އަޅާނެ ކަމަށް ވެސް ފުލުހުން ވަނީ ބުނެފައެވެ.
