މިދިޔަ އޮގަސްޓު މަހު ރާއްޖޭގައި އަސާސީ މުދަލުގެ އެވްރެޖް އަގުތައް 1.15 ޕަސަންޓު ދަށްވި ނަމަވެސް، އެކޮމޮޑޭޝަނާއި ބައެއް ބާވަތްތަކުގެ ކާބޯތަކެތީގެ އަގު ވަރަށް ބޮޑަށް އުފުލިފައިވާ ކަމަށް މޯލްޑިވްސް ސްޓެޓިސްޓިކްސް ބިއުރޯގެ ތަފާސްހިސާބުތަކުން ދައްކައިފިއެވެ. އަދި މަހުން މަހަށް އަސާސީ މުދަލުގެ އަގު ހެޔޮވި ނަމަވެސް، މިދިޔަ އަހަރުގެ މި މުއްދަތާ އަޅާބަލާއިރު މުދަލުގެ އަގުތައް ވަނީ 0.76 ޕަސަންޓު އުފުލިފައެވެ.
އަސާސީ މުދަލުގެ އަގަށް އަންނަ ބަދަލުތައް ދައްކުވައިދޭ ކޮންޒިއުމާ ޕްރައިސް އިންޑެކްސް (ސީޕީއައި) އިން ހާމަވާ ގޮތުގައި، މިދިޔަ މަހު އެންމެ ބޮޑަށް އުފުލުނީ އެކޮމޮޑޭޝަން ހިދުމަތްތަކުގެ އަގުތަކެވެ. އެ ދާއިރާގެ އަގުތަކުން 2.72 ޕަސަންޓުގެ ބޮޑުވުމެއް ފެނިފައިވާއިރު، މުވާސަލާތީ ހިދުމަތްތަކުގެ އަގު ވެސް ވަނީ 2.23 ޕަސަންޓު މައްޗަށް ގޮސްފައެވެ.
ކާބޯތަކެތީގެ ބާވަތްތަކަށް ބަލާއިރު، އާންމު ދިރިއުޅުމުގައި ކޮންމެހެން ބޭނުންވާ ތަރުކާރީއާއި މޭވާގެ އަގުތައް ވަނީ 1.19 ޕަސަންޓު މައްޗަށް ގޮސްފައެވެ. މީގެ އިތުރުން ކިރާއި ބިހުގެ އުފެއްދުންތަކުން 1.19 ޕަސަންޓު އުފުލުނުއިރު، އެހެނިހެން ކާބޯތަކެތީގެ އުފެއްދުންތަކުން 1.11 ޕަސަންޓުގެ ކުރިއެރުމެއް ވަނީ ރެކޯޑުކުރެވިފައެވެ.
ރާއްޖެއަކީ ކާބޯތަކެތި ހިމެނޭހެން ގިނަ ބާވަތްތަކެއް އެތެރެކުރުމަށް އިމްޕޯޓަށް ވަރަށް ބޮޑަށް ބަރޯސާވެފައިވާ ގައުމަކަށްވާތީ، ދުނިޔޭގެ ބާޒާރަށް އަންނަ ބަދަލުތަކުގެ އަސަރު ރާއްޖެއަށް ވަރަށް ބޮޑަށް ކުރެއެވެ. އެގޮތުން މެދުއިރުމަތީގެ ހަނގުރާމައާއި ބައިނަލްއަގުވާމީ ސަޕްލައި ޗެއިންއަށް ދިމާވެފައިވާ ގޮންޖެހުންތަކުގެ ސަބަބުން، ރާއްޖޭގެ ބާޒާރުގައި ތެލާއި މުދަލުގެ އަގުތައް އުފުލުމުގެ ބިރު ވަނީ ބޮޑުވެފައެވެ.
މިއަހަރަކީ ބޭރުގެ ދަރަނީގެ ގޮތުގައި ރާއްޖެއިން 1.1 ބިލިއަން ޑޮލަރު ދައްކަންޖެހޭ އަހަރަކަށްވާއިރު، އަހަރުގެ ބާކީ އޮތް ބައިގައި ތަކެތީގެ އަގު އިތުރަށް އުފުލޭނެ ކަމަށް އޭޝިއަން ޑިވެލޮޕްމެންޓް ބޭންކް (އޭޑީބީ) ފަދަ ބޭރުގެ މާލީ އިދާރާތަކުން ވަނީ ލަފާކޮށްފައެވެ.
