ކަނޑު މަގުން ސިއްރުން ރާއްޖެ އެތެރެކުރަން އުޅުނު 8.5 މިލިއަނަށް ވުރެ ގިނަ ސިނގިރޭޓު ސްޓިކްސް މޯލްޑިވްސް ކަސްޓަމްސް ސާވިސްއިން އަތުލައިގެންފިއެވެ.
ކަސްޓަމްސްއިން މައުލޫމާތު ދީފައިވާ ގޮތުގައި، މި ތަކެތި އަތުލައިގެންފައިވަނީ މިދިޔަ އާދިއްތަ ދުވަހު މާލޭ ވިޔަފާރި ބަނދަރުގައި ހިންގި ޚާއްސަ އޮޕަރޭޝަނެއްގައެވެ. އެގޮތުން، ‘ޖެނެރަލް ކާގޯ’ގެ ގޮތުގައި ޑިކްލެއާކޮށްގެން އެތެރެކުރަން އުޅުނު ޝިޕުމަންޓެއް ބަލައިފާސްކުރިއިރު، 8.5 މިލިއަނަށް ވުރެ ގިނަ ސިނގިރޭޓު ސްޓިކްސް ފެނިފައިވާ ކަމަށް ކަސްޓަމްސްއިން ބުނެއެވެ.
މި ތަކެތި މިހާރު ވަނީ ކަސްޓަމްސްގެ ބެލުމުގެ ދަށަށް ގެންގޮސްފައެވެ.
ދުންފަތުގެ އިސްތިއުމާލު ކުރުމާ ދެކޮޅަށް ސަރުކާރުން ވަނީ ހަރުކަށި ފިޔަވަޅުތަކެއް އަޅައިފައެވެ. އޭގެ ތެރޭގައި 2024 ވަނަ އަހަރު ވޭޕް މަނާކުރުމާއި، 2007 ވަނަ އަހަރުން ފެށިގެން އުފަންވެފައިވާ އަދި ފަހުން އުފަންވާ ކުދިންނަށް ދުންފަތުގެ އިސްތިއުމާލު ކުރުމާއި ގަނެވިއްކުން މަނާކުރުން ހިމެނެއެވެ. ނޮވެމްބަރު 2024 ގައި ދުންފަތުގެ ޑިއުޓީ ބޮޑުކުރި ނަމަވެސް، ދުނިޔޭގެ ސިއްހަތު ޖަމިއްޔާގެ ލަފާއާއެކު މިދިޔަ ޖުލައި މަހު ވަނީ ޑިއުޓީއަށް ބަދަލުތަކެއް ގެނެސްފައެވެ.
