ޓޫރިސްޓުން ރާއްޖެ އިހުތިޔާރުކުރަނީ ގައުމުގެ ރީތިކަމަށް ބަލައިގެން ކަމަށް ވިޔަސް، އެ މީހުން ރާއްޖެއަށް ކުރާ އިތުބާރު ބިނާވާނީ ސަލާމަތާއި ރައްކާތެރިކަން އޮތް މިންވަރެއްގެ މައްޗަށް ކަމަށް ހޯމް މިނިސްޓަރު އަލީ އިހުސާން ވިދާޅުވެއްޖެއެވެ. އަދި މި ރައްކާތެރިކަން ކަށަވަރުކުރުމަކީ ހަމައެކަނި ސަރުކާރަށް އަދާކުރެވޭނެ ޒިންމާއެއް ނޫން ކަމަށް ވެސް މިނިސްޓަރު ފާހަގަކުރެއްވިއެވެ.
މޯލްޑިވްސް އެސޯސިއޭޝަން އޮފް ފަޔާ ސެކިއުރިޓީ އެންޑް ސޭފްޓީ އިންޑަސްޓްރީ (މަފްސީ) އިން އިންތިޒާމްކޮށްގެން ބޭއްވި “ސޭފްޓީ އެންޑް ސެކިއުރިޓީ ކޮންފަރެންސް މޯލްޑިވްސް 2026” ފެށުމުގެ ރަސްމިއްޔާތުގައި ވާހަކަދައްކަވަމުން މިނިސްޓަރު ވިދާޅުވީ، ރާއްޖެއަކީ މުޅި ދުނިޔޭގައި ވެސް ފާހަގަކޮށްލެވޭ އެންމެ ކާމިޔާބު ޓޫރިޒަމް އޮތް އެއް ގައުމު ކަމަށެވެ. އަދި ރާއްޖެ އަންނަ ޓޫރިސްޓުން ތަޖުރިބާކުރާ ހިތްފަސޭހަކަމުގެ އެންމެ ބޮޑު ސިއްރަކީ ގައުމުގައި އޮތް އަމާންކަމާއި ރައްކާތެރިކަން ކަމަށް ބަޔާންކުރެއްވިއެވެ.
ރައްކާތެރިކަމުގެ މުހިންމުކަމާ ގުޅޭގޮތުން އިތުރަށް ވާހަކަދައްކަވަމުން މިނިސްޓަރު އިހުސާން ވިދާޅުވީ، ރައްކާތެރިކަމަކީ ހަމައެކަނި ސަރުކާރުގެ ނުވަތަ ސަލާމަތީ ބާރުތަކުގެ ޒިންމާއެއް ނޫން ކަމަށެވެ. އެއީ ރާއްޖޭގެ ޓޫރިޒަމް ޕްރޮޑަކްޓާއި މަޝްހޫރުކަމުގެ ވެސް މުހިންމު ބައެއް ކަމަށާއި، އެކަން ހިމާޔަތްކުރުމަކީ ފަތުރުވެރިކަމުގެ ދާއިރާގައި މަސައްކަތްކުރާ ހުރިހާ ފަރާތްތަކެއްގެ ވެސް ވާޖިބެއް ކަމަށް ވިދާޅުވިއެވެ.
މީގެ އިތުރުން ޓޫރިޒަމްގެ ސަލާމަތީ މާހައުލު ވަރަށް ބޮޑަށް ބަދަލުވަމުންދާކަން ފާހަގަކުރައްވައި މިނިސްޓަރު ވިދާޅުވީ، މިހާރު ރައްކާތެރިކަމުގެ ވާހަކަ ދައްކާއިރު އެއީ ހަމައެކަނި އާންމު ކުށްތަކާ ގުޅޭ ކަމެއް ނޫން ކަމަށެވެ. އަލިފާނުގެ ހާދިސާތަކާއި އެކްސިޑެންޓްތަކުގެ އިތުރުން ކަނޑުމަތީގެ ހާދިސާތަކާއި، މޫސުމީ ބަދަލުތަކާއި، ސައިބާ ހަމަލާތަކާއި ޑޭޓާ ބްރީޗްތަކުގެ އިތުރުން އޮންލައިން ފްރޯޑް ފަދަ އާ ގޮންޖެހުންތަކާ މިއަދު ކުރިމަތިލާންޖެހިފައިވާ ކަމަށް ވިދާޅުވިއެވެ.
ރާއްޖެ ފަދަ ވަކިވަކި ރަށްތަކެއްގެ މައްޗަށް އެކުލެވިފައިވާ ޖަޒީރާ ގައުމަކަށް މިފަދަ ގޮންޖެހުންތައް ވަކިން ބޮޑަށް އުނދަގޫވާނެ ކަމަށް މިނިސްޓަރު ފާހަގަކުރެއްވިއެވެ. އެހެންކަމުން ހާދިސާއެއް ހިނގުމުން ފިޔަވަޅު އެޅުމުގެ ބަދަލުގައި، އެންމެން ގުޅިގެން ކުރިއާލައި ރައްކާތެރިކަމުގެ ފިޔަވަޅުތައް އެޅުމަކީ ޓޫރިޒަމް ސިނާއަތުގެ ކުރިމަގު ސަލާމަތްކުރުމަށް ކޮންމެހެން މުހިންމު ކަމެއް ކަމަށް ވިދާޅުވެ މިނިސްޓަރު ވަނީ ވާހަކަ ނިންމަވާލައްވާފައެވެ.
