ރަސްމާލެ މަޝްރޫއުގެ ދަށުން ޔޫއޭއީގެ އީގަލް ހިލްސް ކުންފުންޏާއެކު ދިވެހި ސަރުކާރުން ވެފައިވާ ވިޔަފާރި އެއްބަސްވުމަކީ ގާނޫނާ ހިލާފު އެއްބަސްވުމެއް ކަމަށް ކަނޑައަޅައިދިނުމަށް އެދި ސުޕްރީމް ކޯޓަށް މައްސަލައެއް ހުށަހަޅައިފިއެވެ.
މި މައްސަލަ ސުޕްރީމް ކޯޓަށް ހުށަހެޅުއްވީ ރައްޔިތުންގެ މަޖިލީހުގެ ކެންދޫ ދާއިރާގެ ކުރީގެ މެންބަރު އަދި ގާނޫނީ ވަކީލު އަލީ ހުސައިންއެވެ. އަލީ ހުސައިން ވިދާޅުވި ގޮތުގައި، ރަސްމާލެއިން ހިއްކާ 500 ހެކްޓަރަށް ވުރެ ބޮޑު ސަރަހައްދެއް އެއްވެސް އަގަކާ ނުލައި އަދި ކުއްޔެއްވެސް ނުނަގާ ގޮތަށް 99 އަހަރަށް ވަނީ އީގަލް ހިލްސްއަށް ދޫކޮށްފައެވެ.
ގާނޫނުއަސާސީގެ 250 ވަނަ މާއްދާގައި ދައުލަތުގެ މުދަލެއް ނުވަތަ މިލްކިއްޔާތެއް ކުއްޔަށް ދިނުމާއި ދޫކުރުން ފަދަ ކަންކަން ކުރަންވާނީ ގާނޫނުގައިވާ ގޮތުގެ މަތިން ކަމަށް ބަޔާންކޮށްފައިވީ ނަމަވެސް، ބޭރުގެ ފަރާތަކަށް އެއްފަހަރާ 99 އަހަރަށް މިފަދައިން ދައުލަތުގެ ބިން ދޫކުރެވޭނެ ގާނޫނީ އޮނިގަނޑެއް ނެތް ކަމަށް އޭނާ ފާހަގަކުރެއްވިއެވެ.
އެހެންކަމުން މި މައްސަލައިގައި ވަކި ގޮތެއް ނިންމަންދެން އެއްބަސްވުމަށް އަމަލުކުރުން ވަގުތީ ގޮތުން ފަސްކުރުމުގެ އަމުރަކަށްވެސް އޭނާ ވަނީ އެދިވަޑައިގެންފައެވެ.
