ރާއްޖޭގައި ހިމަބިހި ފެތުރޭ މިންވަރު އިތުރުވެ، މި އަހަރުގެ މިހާތަނަށް މި ބައްޔަށް ފައްސިވި މީހުންގެ އަދަދު 240 އަށް ވުރެ މައްޗަށް ހިނގައްޖެއެވެ.
ކަމާބެހޭ އިދާރާތަކުން އާންމުކޮށްފައިވާ ތަފާސްހިސާބުތަކަށް ބަލާއިރު، މިދިޔަ ހަފުތާގައި އެކަނިވެސް މާލެ ސަރަހައްދުން އިތުރު 17 މީހަކު ވަނީ މި ބައްޔަށް ފައްސިވެފައެވެ. މިއާއެކު، މި އަހަރު ހިމަބިހި ޖެހުނު މީހުންގެ ޖުމްލަ އަދަދު މިހާރު ވަނީ 243 އަށް އަރާފައެވެ.
ދުނިޔޭގެ ސިއްހަތު ޖަމިއްޔާއިން 2017 ވަނަ އަހަރު ވަނީ ރާއްޖެއިން ހިމަބިހި ނައްތާލާފައިވާ ކަމަށް ކަނޑައަޅާފައެވެ. އެހެންނަމަވެސް، އޭގެ ފަހުން 2020 ވަނަ އަހަރާއި 2023 ވަނަ އަހަރު ވެސް މި ބަލީގެ ކޭސްތަކެއް ވަނީ ފެނިފައެވެ. އަދި މި އަހަރު ބަލި ފެތުރޭ މިންވަރު މިވަނީ ވަރަށް ބޮޑަށް އިތުރުވެފައެވެ.
ބަލި ކޮންޓްރޯލް ކުރުމަށްޓަކައި ހެލްތު މިނިސްޓްރީން އަންނަނީ ގިނަ މަސައްކަތްތަކެއް ކުރަމުންނެވެ. އެގޮތުން، ވެކްސިން ފުރިހަމަނުކުރާ ފަރާތްތައް ހޯދައި، ވީ އެންމެ އަވަހަކަށް ވެކްސިން ޖެހުމަށް އެ މިނިސްޓްރީން އަންނަނީ އިރުޝާދު ދެމުންނެވެ.
ހިމަބިއްސަކީ ވައިގެ ޒަރީއާއިން ވަރަށް ފަސޭހައިން ފެތުރޭ ބައްޔަކަށް ވާތީ، ބަލީގެ އަލާމާތެއް ފެނިއްޖެނަމަ ލަސްނުކޮށް ޑޮކްޓަރަށް ދެއްކުމަކީ ވަރަށް މުހިންމު ކަމެކެވެ. މީގެ އިތުރުން، ބަލީގެ އަލާމާތްތައް ހުރިނަމަ މީހުން އެއްވެ އުޅޭ ތަންތަނަށް ނުދިއުމަށް ކަމާބެހޭ ފަރާތްތަކުން އެދެއެވެ.
