ދައުލަތަށް އެންމެ ގިނައިން ޓެކްސް ދައްކާ އަދި ޓެކްސްގެ ގާނޫނުތަކާއި ގަވާއިދުތަކަށް ފުރިހަމައަށް އަމަލުކުރާ ކުންފުނިތަކުގެ ތެރޭގައި ހިމެނި، މޯލްޑިވްސް އިންލަންޑް ރެވެނިއު އޮތޯރިޓީ (މީރާ) އިން ދޭ “ރަންލާރި އެވޯޑު” އަނެއްކާވެސް އުރީދޫ މޯލްޑިވްސްއަށް ލިބިއްޖެއެވެ.
މި އެވޯޑަކީ ޓެކްސް ބަޔާންތައް ގަވާއިދުން ހުށަހެޅުމާއި، މައުލޫމާތުގެ ސައްހަކަން ހިފެހެއްޓުމުގެ އިތުރުން ކަނޑައެޅިފައިވާ މުއްދަތުގެ ތެރޭގައި ގަވާއިދުން ޓެކްސް ފައިސާ ދައްކާ ފަރާތްތަކުގެ އަގުވަޒަންކުރުމުގެ ގޮތުން މީރާއިން ދެމުން އަންނަ ހާއްސަ އެވޯޑެކެވެ.
އުރީދޫއިން ބުނި ގޮތުގައި މީރާ މި އެވޯޑު އަލުން ލިބުމަކީ އެ ކުންފުންޏަށް ލިބުނު ވަރަށް ބޮޑު ޝަރަފެކެވެ. އަދި ރާއްޖޭގެ އިގްތިސާދީ ކުރިއެރުމަށާއި މުޅި ގައުމުގެ ތަރައްގީއަށް ކުރެވޭ މަސައްކަތްތަކުގައި އެ ކުންފުނީގެ އެހީތެރިކަމާއި އެއްބާރުލުން އަބަދުވެސް ދެމިއޮންނާނެ ކަމަށް އުރީދޫއިން ހާމަކުރެއެވެ.
މީރާއިން 2025 އިން 2026 އަށް އެކުލަވާލާފައިވާ ކޮމްޕްލަޔަންސް އިމްޕްރޫވްމަންޓް ޕްލޭންގެ ދަށުން، އަމިއްލަ އިހުތިޔާރުގައި ޓެކްސް ދައްކާ ފަރާތްތައް އިތުރުކުރުމަށް އަމާޒުހިފާފައިވާއިރު، ރަންލާރި އެވޯޑް ހާސިލުކުރާ ކުންފުނިތަކަކީ އެހެން ވިޔަފާރިތަކަށް އޮތް ނަމޫނާއެއް ކަމަށް މީރާއިން ވަނީ ބުނެފައެވެ. ޓެކްސްގެ އިތުރުން އުރީދޫއަކީ ރާއްޖޭގެ އިޖުތިމާއީ އަދި ޑިޖިޓަލް ތަރައްގީއަށްވެސް ގިނަގުނަ މަސައްކަތްތަކެއް ކުރަމުން އަންނަ ކުންފުންޏެކެވެ.
