ކ. ގާފަރު ކައިރިއަށް އަޑިއަށް ދިޔަ ލޭންޑިން ކްރާފްޓުން ގެއްލުނު ދެ ބިދޭސީން ހޯދުމަށް އެމްއެންޑީއެފް ކޯސްޓްގާޑުން ކަނޑާއި ވައިގެ މަގުން ހާއްސަ އޮޕަރޭޝަނެއް ދަނީ ހިންގަމުން އަންނަކަން ހާމަކޮށްފިއެވެ.
ކ. ތިލަފުށިން ފުރައިގެން ދަތުރުކުރި މި އުޅަނދު ހުކުރު ދުވަހު އަޑިއަށް ދިޔައިރު، އޭގައި ދެ ދިވެހިންނާއި އަށް ބިދޭސީންނާއެކު ޖުމްލަ 10 މީހުން ތިއްބެވެ. ފުލުހުން މައުލޫމާތު ދޭ ގޮތުގައި، މި ހާދިސާގެ ރިޕޯޓު ލިބިފައިވަނީ އިއްޔެ ހެނދުނު 08:48 އެހައިކަންހާއިރުއެވެ.
އެމްއެންޑީއެފުން ބުނީ، ލޭންޑިން ކްރާފްޓް އަޑިއަށް ދިޔަ ސަރަހައްދު ބަލައި ފާސްކުރުމުގެ މަސައްކަތް މޫސުން ތަންދިން އެންމެ ބޮޑަކަށް ދަނީ ކުރަމުންނެވެ. އަދި އެ ސަރަހައްދުން ދަތުރުކުރާ އުޅަނދުފަހަރުން މިކަމަށް ހާއްސަ ސަމާލުކަމެއް ދިނުމަށް ވަނީ އިލްތިމާސްކޮށްފައެވެ.
މި ހާދިސާއިން ސަލާމަތްވި އަށް މީހުން މިހާރު ތިބީ ގާފަރުގެ ގެސްޓު ހައުސްއެއްގައި ކައުންސިލުގެ ބެލުމުގެ ދަށުގައި ކަމަށް ގާފަރު ކައުންސިލުގެ ރައީސް މުބާޝިރު ޖަލީލް ބުންޏެވެ.
ފުލުހުންނާއި އެމްއެންޑީއެފް ގުޅިގެން މި ހާދިސާ ހިނގަން މެދުވެރިވި ސަބަބު ތަހުގީގު ކުރަމުންދާއިރު، ސަލާމަތްވި މީހުންގެ ހާލު ރަނގަޅުވަމުން އަންނަ ކަމަށް ގާފަރު ކައުންސިލުން މައުލޫމާތުދެއެވެ.
މި ހިތާމަވެރި ހާދިސާ ހިނގާފައިވަނީ ރާއްޖޭގެ ބޮޑު ބަޔަކަށް މޫސުން ގޯސްވެ، ކަނޑުގަދަވެފައިވާ ދަނޑިވަޅެއްގައެވެ. މޫސުން ގޯސްވުމުގެ ސަބަބުން ކަނޑުދަތުރުފަތުރު ކުރުމުގައި ސަލާމަތީ ފިޔަވަޅުތަކަށް ފުރިހަމައަށް އަމަލުކުރުމަށް ކަމާބެހޭ ފަރާތްތަކުން ދަނީ އިރުޝާދު ދެމުންނެވެ.
