މައްޗަންގޮޅީ ދެކުނު ދާއިރާގެ މެމްބަރު ސިނާން އިއްޔެ ރާއްޖެ އައިތަނުން ހައްޔަރުކޮށްފައި ވަނިކޮށް ކްރިމިނަލް ކޯޓުން އޭނާ ދޫކޮށްލައިފިއެވެ.
މެމްބަރު ސިނާން ދޫކޮށްލާފައިވަނީ ބަންދުގެ މުއްދަތު އިތުރުކުރުމަށް މިއަދު ކްރިމިނަލް ކޯޓަށް ހާޒިރު ކުރުމުންނެވެ.
ކްރިމިނަލް ކޯޓުން ދޫކޮށްލުމުން ސިނާން މީޑިއާއާ ވާހަކަ ދައްކަވަމުން ވިދާޅުވީ ކުރަމުން އަންނަ މަސައްކަތުގައި ދެމިހުންނަވާނެ ކަމަށާއި ފެންނަމުން މި ދަނީ ކާމިޔާބު ލިބެމުންދާ މަންޒަރު ކަމަށެވެ.
ސިނާން އާއެކު އިއްޔެ ހައްޔަރުކުރި މެންބަރު އިލްހާމް އަހްމަދުގެ ބަންދުގެ މައްސަލަ އަދިވެސް ދަނީ ކުރިއަށެވެ.
އިލްހާމާއި ސިނާން ގިނަ ދުވަސްތަކެއް ވަންދެން ރާއްޖެއިން ބޭރުގައި އުޅުއްވުމަށް ފަހު ވަޑައިގެންނެވިއިރު، އެ ދެބޭފުޅުން ހޯދުމަށް މިދިޔަ މަހުގެ 31 ވަނަ ދުވަހު ފުލުހުން ވަނީ އިއުލާން ކޮށްފައެވެ.
ދެ ބޭފުޅުން ރާއްޖެ ވަޑައިގަތްއިރު، އެ ބޭފުޅުންގެ ގޮނޑި ގެއްލިފައިވާ ކަމަށް އިލެކްޝަން ކޮމިޝަން (އީސީ)އިން ނިންމި ނިންމުން ސުޕްރީމް ކޯޓުގެ އަމުރަކުން ވަނީ ބާތިލުކޮށްފަ އެވެ. އަދި އެ ދެ ބޭފުޅުން ހައްޔަރުކުރަން ކުރިމިނަލް ކޯޓުން ނެރުނު އަމުރު އެ ކޯޓުން ވަނީ ބާތިލްކޮށްފަ އެވެ.
