ވައްކަމާއި ކޮރަޕްޝަނަށް ފުރުސަތު ދިން ސަރުކާރުތަކުގެ ސަފުހާ ދިވެހި ރައްޔިތުން ބަންދުކޮށްފައިވާ ކަމަށާއި، 2023 ވަނަ އަހަރު ރައީސުލްޖުމްހޫރިއްޔާ ޑރ. މުހައްމަދު މުއިއްޒާ ގައުމުގެ އަމާނާތް ހަވާލުކުރީ އިހްލާސްތެރި ހެޔޮވެރިކަމެއްގެ އުއްމީދުގައި ކަމަށް ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ ވިދާޅުވެއްޖެއެވެ.
މަޖިލީހުގެ ރައީސް މިފަދައިން ވިދާޅުވީ މިއަދުގެ ޖަލްސާގައި ކުރިއަށްދިޔަ ބަހުސްގެ ތެރެއިން، އިދިކޮޅު މެންބަރުން ސަރުކާރަށް އަމާޒުކުރެއްވި ބައެއް ފާޑުކިޔުންތަކަށް ރައްދު ދެއްވަމުންނެވެ. އެމަނިކުފާނު ވިދާޅުވީ، ވައްކަން ކުރާ ސަރުކާރުތަކާ މެދު ރައްޔިތުން އަމަލުކުރާނެ ގޮތް މާޒީގައި ވަނީ ވަރަށް ސާފުކޮށް ދައްކާފައި ކަމަށެވެ.
“އަޅުގަނޑުމެންގެ މަޖިލީހުން ކުރާނެ މަސައްކަތަކީ ހެޔޮވެރިކަމެއް ގާއިމުކުރުމަށް ސަރުކާރަށް އެއްބާރުލުން ދިނުން،” އަބްދުއްރަހީމް ޔަގީންކަން އެރުވިއެވެ.
ދުންފަތުގެ ބާވަތްތަކުން ނަގާ ޑިއުޓީ ބޮޑުކުރުމަކީ “ވައްކަމުގެ މާކެޓެއް އުފެއްދުން” ކަމަށް ތުހުމަތުކުރައްވައި ހަނިމާދޫ ދާއިރާގެ މެންބަރު އަބްދުލްގަފޫރު މޫސާ ދެއްކެވި ވާހަކަތަކަށް އަބްދުއްރަހީމް ރައްދު ދެއްވިއެވެ. އަދި ރައްޔިތުން މި ސަރުކާރު ގެނައީ އެފަދަ ނުރަނގަޅު އާދަތަކަށް “ނޫނެކޭ” ބުނުމަށްފަހު ކަމަށް ވިދާޅުވިއެވެ.
މިހާރުގެ މަޖިލީހަކީ “ރަބަރު ސްޓޭމްޕް” މަޖިލީހެއްގެ ގޮތުގައި ސިފަކުރެއްވި ގަލޮޅު ދެކުނު ދާއިރާގެ މެންބަރު މީކާއީލް އަހުމަދު ނަސީމަށް ވެސް ރިޔާސަތުން ވަނީ ރައްދު ދެއްވާފައެވެ. އަބްދުއްރަހީމް ހަނދާންކޮށްދެއްވީ، މީކާއީލަކީ 19 ވަނަ މަޖިލީހުގެ ވެސް މެންބަރެއް ކަމަށާއި، އޭރު ކަންކަން ހިނގައިދިޔަ ގޮތް އެނގިވަޑައިގަންނަވާނެ ކަމަށެވެ. މީގެ އިތުރުން، ސަރުކާރު ޖަވާބުދާރީ ކުރުވުމުގެ ޒިންމާ މަޖިލީހުން އަދާނުކުރާ ނަމަ ކުރިއަށް އޮތް އިންތިހާބުތަކުގައި ނާކާމިޔާބީއާ ކުރިމަތިލާން ޖެހިދާނެ ކަމަށް ބުނެ މީކާއީލް ދެއްކެވި ވާހަކަތަކަށް ވެސް އަބްދުއްރަހީމް ވަނީ އިންކާރު ކުރައްވާފައެވެ.
އާންމުގޮތެއްގައި މަޖިލީހުގެ ރިޔާސަތުން ބަހުސްތަކުގެ ތެރެއަށް ވެދެވަޑައިނުގެންނެވި ނަމަވެސް، މިއަދުގެ ޖަލްސާގައި ސަރުކާރުގެ ސިޔާސަތުތަކަށް އަމާޒުވި ބައެއް ތުހުމަތުތަކާ ގުޅިގެން ރިޔާސަތުން ވަނީ ސަރުކާރުގެ ދިފާއުގައި ވާހަކަ ދައްކަވާފައެވެ.
