އެންމެ ކުދި، ކުދި އަދި މެދުފަންތީގެ ވިޔަފާރިތަކުގެ ދުވަސް (އެމްއެސްއެމްއީ ޑޭ) ފާހަގަކުރުމުގެ ގޮތުން ބިޒްނަސް ސެންޓަރ ކޯޕަރޭޝަން (ބީސީސީ) އިން ބާއްވާ ހާއްސަ “އެމްއެސްއެމްއީ ޕިޗް” މުބާރާތުގައި ބައިވެރިވުމުގެ ފުރުސަތު އެންމެ ފުރަތަމަ ކުރިމަތިލާ 10 ޓީމަކަށް އެކަނި ލިބޭ ގޮތަށް މިއަދު ހުޅުވާލައިފިއެވެ. ބީސީސީ އާއި އިކޮނޮމިކް މިނިސްޓްރީ ގުޅިގެން ކުރިއަށްގެންދާ މި މުބާރާތަކީ ހުރިހާ އުމުރުފުރާއެއްގެ މީހުންނަށްވެސް ބައިވެރިވެވޭ ގޮތަށް ހުޅުވާލާފައިވާ މުބާރާތެކެވެ.
މި މުބާރާތް ބޭއްވުމުގެ މައިގަނޑު މަގުސަދަކީ ޒުވާނުންގެ މެދުގައި އީޖާދީ ވިސްނުމާއި ވިޔަފާރީގެ ހުނަރުތައް ކުރިއަރުވައި، އާ ވިޔަފާރިތަކުގެ ހިޔާލުތައް ހުށަހެޅުމުގެ މައިދާނެއް ތަނަވަސްކޮށްދިނުމެވެ. މި މުބާރާތުގައި ބައިވެރިވާން ބޭނުންވާ ފަރާތްތަކުން ދެ މީހުންގެ ޓީމުތައް އެކުލަވާލަންޖެހޭއިރު، މުބާރާތުގެ ފުރުސަތުތައް މަދުވުމުގެ ސަބަބުން ރަޖިސްޓްރީ ކުރުމުގެ ފުރުސަތު ދިނުމަށް ހަމަޖެހިފައިވަނީ އެންމެ ކުރިން ކުރިމަތިލާ 10 ޓީމަށް އެކަނި ކަމަށް ބީސީސީން މައުލޫމާތުދެއެވެ.
މި މުބާރާތުން އެއްވަނައަށް ހޮވޭ ޓީމަކަށް 10،000 ރުފިޔާގެ ފައިސާގެ އިނާމެއް ދޭން ނިންމާފައިވާއިރު، މިއީ ޒުވާނުންނަށް އެމީހުންގެ ވިޔަފާރި ހިޔާލުތައް ދައްކާލުމަށާއި، ޕްރެޒެންޓޭޝަން ހުށަހެޅުމުގެ ހުނަރު ތަރައްގީކޮށް، ދާއިރާގެ ތަޖުރިބާކާރުންނާ ބައްދަލުކުރުމަށް ލިބޭ ރަނގަޅު ފުރުސަތެއްގެ ގޮތުގައި ބީސީސީން ވަނީ ސިފަކޮށްފައެވެ. މި މުބާރާތުގައި ބައިވެރިވާން ބޭނުންވާ ފަރާތްތަކުން ބީސީސީގެ ރަސްމީ ސޯޝަލް މީޑިއާ ޕްލެޓްފޯމްތަކުގައި ހިއްސާކޮށްފައިވާ ޕޯސްޓުތަކުގައިވާ ކިއުއާރު ކޯޑު މެދުވެރިކޮށް ރަޖިސްޓަރ ކުރެވޭނެ ކަމަށް އެ ކުންފުނިން ބުންޏެވެ.
މި ހަރަކާތަކީ ރާއްޖޭގެ ކުދި އަދި މެދު ފަންތީގެ ވިޔަފާރިތަކުގެ ދާއިރާ ވަރުގަދަކޮށް، ޒުވާން ވިޔަފާރިވެރިންގެ އީޖާދީ ހިޔާލުތައް ހަގީގީ ވިޔަފާރިތަކަށް ބަދަލުކުރުމަށް އެހީތެރިވުމަށް ސަރުކާރުން ކުރާ މަސައްކަތްތަކުގެ ދަށުން ހިންގާ މުހިންމު ހަރަކާތެކެވެ. ސަރުކާރުގެ އަމާޒަކީ މިފަދަ ހަރަކާތްތައް މުޅި ރާއްޖޭގައި ކުރިއަށްގެންގޮސް، ޕްރައިވެޓް ސެކްޓަރ ކުރިއަރުވައި، އާ ޖީލެއްގެ ވިޔަފާރިވެރިން އުފެއްދުމެވެ.
