ބާންލީ އަތުން 1-0 އިން މޮޅުވެ، 2004 ވަނަ އަހަރަށްފަހު ފުރަތަމަ ފަހަރަށް އިނގިރޭސި ޕްރިމިއާ ލީގު ކާމިޔާބުކުރުމާ ގާތަށް އާސެނަލް ޖެހިލައިފިއެވެ.
ރޭ ކުޅެވުނު މިމެޗުން އާސެނަލްއަށް ލިބުނު މޮޅާއެކު ތާވަލުގެ އެއްވަނައިގައި ފަސް ޕޮއިންޓުގެ ލީޑެއް ނަގައި، 22 އަހަރުވީ ދިގު އިންތިޒާރަށް ނިމުމެއް ގެނައުމުގެ ފުރުސަތު އެޓީމަށް މިވަނީ ބޮޑުވެފައެވެ.
ރޭ ކުޅުނު މި މެޗުގެ ހަމައެކަނި ލަނޑު ކައި ހާވާޓްޒް ބޮލުން ކާމިޔާބުކޮށްދިން އިރު، ދެވަނަ ހާފުގައި އޭނާ ކުރި ނުރައްކާތެރި ފައުލަކަށް ރަތް ކާޑެއް ނުދެއްކުމަކީ އާސެނަލަށް ލިބުނު ވަރަށް ބޮޑު ނަސީބެކެވެ. އެހެން ނޫންނަމަ، ލީގު ހޯދުމުގެ ރޭހުގައި މެންޗެސްޓާ ސިޓީއަށް ކުރިލިބުމުގެ ފުރުސަތު އޮތީ ހުޅުވިފައެވެ.
ސަޕޯޓަރުންގެ ބޮޑު ތަރުހީބަކާއެކު އަމިއްލަ ދަނޑުގައި ކުޅުނު މި މެޗުގައި އާސެނަލުން ފަސޭހަ މޮޅެއް ހޯދާނެ ކަމަށް ބެލެވުނު ނަމަވެސް، ބާންލީން ވަނީ އާސެނަލަށް ވަރުގަދަ ކުރިމަތިލުމަކާ ކުރިމަތިލާން ޖައްސާފައެވެ. މިގޮތުން މެޗުގެ ކުރީކޮޅު ބާލިންގެ ލިއަންޑްރޯ ޓްރޮސާޑް ފޮނުވާލި ހަމަލާއެއް ގޯލުގެ ދަނޑީގައި ޖެހުނުއިރު، ބުކާޔޯ ސަކާ އަށް ކުރި ފައުލަކަށް ޕެނަލްޓީއެއް ދީފައެއް ނުވެއެވެ.
އާސެނަލަށް މި މެޗުގައިވެސް ކުރިލިބުނީ އެޓީމުން އާންމުކޮށް ބޭނުންކުރާ “ސެޓް-ޕީސް” އުކުޅަކުންނެވެ. މެޗުގެ 37 ވަނަ މިނެޓުގައި ސަކާ ނަގައިދިން ކޯނަރަކުން ހާވާޓްޒް ވަނީ ބޮލުން ގޯލުގެ ތެރެއަށް ބޯޅަ ފޮނުވާލާފައެވެ. މިއީ މި ސީޒަނުގައި ކޯނަރުން އާސެނަލުން ކާމިޔާބުކުރި 18 ވަނަ ލަނޑެވެ.
ޕްރިމިއާލީގުގައި މިރޭ ބޯންމައުތު އަތުން ސިޓީ ބަލިވެއްޖެނަމަ، އަންގާރަ ދުވަހު އާސެނަލަށް ލީގު ޗެމްޕިއަންކަން ކަށަވަރުވާނެއެވެ. ސިޓީން ކުރިއަށް ހުރި މެޗުތައް ކާމިޔާބު ކުރި ނަމަވެސް، އަންނަ އާދީއްތަ ދުވަހު ކްރިސްޓަލް ޕެލަސް އަތުން މޮޅުވެގެން އާސެނަލަށް ތަށި އުފުލާލެވޭނެއެވެ. ނަމަވެސް، ރެލިގޭޓްވެފައިވާ ބާންލީ އަތުން އާސެނަލް ހަނި މޮޅެއް ހޯދުމަކީ ސިޓީއަށް އަދިވެސް އުންމީދެއް އޮތް ކަމެކެވެ. އާސެނަލް އާއި ޕެލަސް ކުޅޭ މެޗު އެއްވަރުވެ، ސިޓީން ބާކީ އޮތް ދެ މެޗު ކާމިޔާބު ކޮށްފިނަމަ، ގޯލުގެ ތަފާތުން ސިޓީއަށް ތަށި އަތުލުމުގެ ފުރުސަތު އޮންނާނެއެވެ.
މީގެ އިތުރުން، މި ސީޒަނަށްފަހު ޕެޕް ގާޑިއޯލާ ސިޓީ ދޫކޮށްލާނެ ކަމަށް މީޑިއާ ރިޕޯޓްތައް ބުނުމާއެކު، ސީޒަނުގެ ފަހު ދުވަސްތަކަށް ވަނީ އިތުރު ފޯރިއެއް އައިސްފައެވެ.
ކޮންމެއަކަސް، އާސެނަލް ލީގު ތައްޓާ ގާތަށް ގެންގޮސްދިނީ އެޓީމުގެ ވަރުގަދަ ޑިފެންސެވެ. މިދިޔަ މަހު ސިޓީ އަތުން ބަލިވި މެޗަށްފަހު ލީގުގައި އާސެނަލް ކުޅުނު ހަތަރު މެޗުގައިވެސް އާސެނަލް ކޮޅަށް ލަނޑެއް ވަދެފައެއް ނުވެއެވެ. މި ވަރުގަދަ ދިފާއީ ރެކޯޑަކީ އެޓީމަށް ލީގު ކާމިޔާބުކުރުމަށް ލިބޭ އެންމެ ބޮޑު ހިތްވަރެވެ.
