ހުޅުމާލެ ފޭސް 2 ގެ ހިޔާ ޓަވަރު 8 ގައި ހިނގި ނުރައްކާތެރި އަލިފާނުގެ ހާދިސާއާ ގުޅިގެން ހަތަރު މީހުންގެ އާއިލާއެއް ހާލުގައި ޖެހި، އެ މީހުންނަށް ކުއްލި އެހީތެރިކަން ފޯރުކޮށްދޭން ފަށައިފިއެވެ. މި ހާދިސާ ހިނގާފައިވަނީ އެ ޓަވަރުގެ 15 ވަނަ ފަންގިފިލާގެ އެޕާޓްމަންޓެއްގައި ކަމަށްވާއިރު، އަލިފާނުގެ ސަބަބުން އެ ތަނަށް ވަނީ ބޮޑެތި ގެއްލުންތަކެއް ވެފައެވެ.
އެންޑީއެމްއޭއިން ބުނީ، މި ހާދިސާގައި އެޕާޓްމަންޓުގެ އެއް ކޮޓަރި އެއްކޮށް އަނދައި، ދިރިނޫޅެވޭ ވަރަށް ހަލާކުވެފައިވާ ކަމަށެވެ. އަލިފާން ރޯވި ވަގުތު އެ ގޭގައި ތިބި ހަތަރު މީހުންގެ އާއިލާ މިހާރު ވަނީ ވަގުތީ ބޯހިޔާވަހިކަމަކަށް ބޭނުންވެފައެވެ. މި ހާދިސާގެ ރިޕޯޓު ލިބުމާއެކު ސިފައިން ވަނީ އެ ސަރަހައްދަށް ގޮސް އަލިފާން ނިއްވުމުގެ މަސައްކަތް ކޮށްފައެވެ.
ހާލުގައި ޖެހުނު އާއިލާއަށް އެންޑީއެމްއޭގެ ފަރާތުން މިހާރު ދަނީ ޒަރޫރީ އެހީތެރިކަން ފޯރުކޮށްދެމުންނެވެ. އެ އޮފީހުން ބުނީ، އެ މީހުންނަށް ބޭނުންވާ ވަގުތީ ހުރުމާއި ކާބޯތަކެތި ހަމަޖައްސައިދިނުމުގެ މަސައްކަތް ކުރަމުންދާ ކަމަށެވެ. މި ހާދިސާ ހިނގަން މެދުވެރިވި ސަބަބު ދެނެގަތުމަށްޓަކައި ކަމާބެހޭ އިދާރާތަކުން މިހާރު ދަނީ ތަހުގީގު ކުރަމުންނެވެ.
