އައްޑޫ ސިޓީ ފޭދޫ ބަނދަރު ބޭރުގައި އޮތް ޑައިވިންގ ދޯންޏެއްގައި އަލިފާން ރޯވެ، އަލިފާން ނިއްވުމުގެ މަސައްކަތް ކުރަމުން ދަނިކޮށް އެ ދޯނި އަޑިއަށް ގޮސްފިއެވެ. މި ހާދިސާގައި އެކަކުގެ ފައި ފިހިގެން ފަރުވާ ދީފައިވެއެވެ.
އެމްއެންޑީއެފް ސަދަން އޭރިއާ ކޮމާންޑް، ހިތަދޫ ފަޔާ ސްޓޭޝަނަށް މި ހާދިސާގެ ރިޕޯޓު ލިބިފައިވަނީ މިއަދު މެންދުރު 13:30 އެހާއިރުއެވެ. ސިފައިން ބުނި ގޮތުގައި، ފަޔަރފައިޓަރުން އަލިފާން ނިއްވުމުގެ މަސައްކަތް ކުރަމުން ދަނިކޮށް، މިއަދު ހަވީރު 15:30 ހާއިރު ދޯނި ވަނީ އެއްކޮށް އަޑިއަށް ގޮސްފައެވެ.
އަލިފާން ރޯވި ވަގުތު ދޯނީގައި ތިބި މީހުން ވަނީ ކައިރީގައި އޮތް ސަފާރީއަކަށް އަރައި ސަލާމަތްވެފައެވެ. ނަމަވެސް، މި ހާދިސާގައި އެކަކުގެ ފައި ފިހިގެން ފޭދޫ ސިއްހީ މަރުކަޒުގައި ފަރުވާ ދިނުމަށްފަހު، އޭނާ މިހާރު ވަނީ ދޫކޮށްލާފައެވެ.
މި ހާދިސާގައި ދޯނި ބޭނުންނުކުރެވޭ ވަރަށް އަނދައި، ބޮޑެތި ގެއްލުންތަކެއް ވެފައިވާއިރު، އަލިފާން ރޯވާން މެދުވެރިވި ސަބަބު އަދި ސާފެއް ނުވެއެވެ.
