އަހުރެން ޤަބޫލުކުރާ ގޮތުގައި، ސަޢޫދީއާއި، ޤަޠަރުން މިފެނުނު މޮސާޑުގެ ސެލްތަކާއި، އެޖެންޓުންގެ ކުޅިވަރު، އެ ދެ ޤައުމާއި ހަމައިން އެކަނި ނުނިމޭނެއެވެ. މިހާރު، ޢަރަބި ޢިމާރާތާއި، ބަހުރެއިނާއި، އޮމާނާއި، ކުވައިތާއި، އަދި ޚަލީޖުގެ އެހެން ޤައުމުތަކުގައިވެސް މޮސާޑުގެ ސެލްތަކާއި، އެޖެންޓުން ތިބޭނެކަމީ ސައްތައިން ސައްތަ ކަށަވަރު ކަމެކެވެ.

މި ވާހަކައިން ކުއްލިއަކަށް ހަނދާނަށް އަންނަނީ، 1950 ގެ އަހަރުތަކުގައި މިޞްރުގައި ހިނގި “ލަވޯން އެފެއާރ” ގެ ކަންތައް ގަނޑެވެ. މޮސާޑުން، އެމެރިކާއާއި، އިނގިރޭސިވިލާތުގެ ވަސީލަތްތަކަށް ބޮމުގެ ޙަމަލާތައްދީ، ހުޅަނގާއި މިސްރުގެ ގުޅުން ގޯސްކުރުވައި، ފިތުނައިގެ ބޮޑު އަލިފާން ގަނޑެއްގެ ތެރެއަށް އިސްލާމީ ދުނިޔެ ވައްޓައިލިއެވެ. އިޒުރޭލުގެ އެ މުޑުދާރު ނަޖިސް ޢަމަލުތަކާއެކު އަނެއްކާވެސް ތާރީޚު އަލުން އިޢާދަވަނީއެވެ. އެކަމަކު، ޢަރަބި ވެރިންގެ ލޮލެއް އަދިވެސް ނުހުޅުވެއެވެ. އިޒުރޭލަކުން ދުވަހަކުވެސް ޚަލީޖުގެ ޤައުމުތަކަކީ އިޒުރޭލުގެ އެކުވެރި އިއްތިހާދީންގެ ގޮތުގައި ނުދެކެއެވެ. އިޒުރޭލުން ދެކެނީ ޢަރަބި އިސްލާމީ ޤައުމުތަކަކީ އިޒުރޭލުގެ މަސްލަޙަތު ދެމެހެއްޓުމަށް ބޭނުންކުރާ އާލާތްތަކެއްގެ ގޮތުގައެވެ. އިޒުރޭލުން އެވަނީ މުޅި މެދުއިރުމަތީގެ ސަލާމަތާއި، ރައްކާތެރިކަން ޤުރުބާންކޮށް، އެމެރިކާއާއި ގުޅިގެން އީރާނާއި ދެކޮޅަށް ހަނގުރާމަ ފަށާފައެވެ. މި ހަނގުރާމައަކީ ނޭޓޯގެ ބައިވެރިވުމާއި ނުލައި، އެމެރިކާއިން މެދުއިރުމަތީގައި ކުރާ ފުރަތަމަ ހަނގުރާމައެވެ. އަދި އީރާނަށް ޙަމަލާ ދިނުމަށް، އެމެރިކާގެ ކޮންގްރެސްގެ ރުހުންވެސް، ޓުރަމްޕު ހޯދާފައި ނުވެއެވެ. އީރާނަށް ޙަމަލާދިނުމަށް، ޓްރަމްޕަށް 300 މިލިއަން ޑޮލަރު ރިޝްވަތުގެ ގޮތުގައި ރޮތްސްޗައިލްޑުން ދީފައިވާ ކަމަށްވެސް ބުނެވެއެވެ.

އިޒުރޭލާއި، އެމެރިކާއިން މިހާރު މަސައްކަތް ކުރަމުން ދަނީ ޢަރަބި ޤަބީލާތަކުގެ މެދުގައި ޚިޔާލުތަފާތުވުން އުފައްދައި، އެއްބަޔަކު އަނެއް ބަޔަކާއި ޖެއްސުމުގެ މަސައްކަތެވެ. ތާރީޚުގައި ފުރަތަމަ ފަހަރަށް އިސްލާމީ ޤައުމުތަކުން އިޒުރޭލާއި އެމެރިކާގެ މަސްލަޙަތަށްޓަކާ، އެއްބަޔަކު އަނެއްބަޔަކާ ހަނގުރާމަ ކުރާތަން އަހުރެމެންނަށް ފެނިގެން ދާނެއެވެ.

މި ހަނގުރާމައަށް ފަހު ޤަލްފުގެ ޤައުމުތަކަށް ވާނީ ކިހިނެއް ހެއްޔެވެ؟ އަދި ޓުރަމްޕަށް، ޝައިޠާންޔާހޫގެ ނަޖިސްތައް ފޮރުވޭނެ ހެއްޔެވެ؟