ރާއްޖޭގައި ޝީޝާ ބޭނުންކުރުން މަނާކުރުމަށާއި، ހަކުރު ގިނައިން އެކުލެވޭ ތަކެތިން ޓެކްސް ނަގައި ހަކުރަށް ދޭ ސަބްސިޑީ ކަނޑާލުމާ ގުޅޭގޮތުން ސަރުކާރުގެ އެކި ފެންވަރުގައި މަޝްވަރާ ކުރަމުންދާ ކަމަށް ހެލްތު މިނިސްޓަރު އަބްދުﷲ ނާޒިމް އިބްރާހިމް ވިދާޅުވެއްޖެ އެވެ. ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމެއްގައި މިނިސްޓަރު ވިދާޅުވީ، މިއީ އާންމު ސިއްހަތު ރައްކާތެރިކުރުމަށް ސަރުކާރުން އަޅަން ގަސްތުކުރާ މުހިންމު ފިޔަވަޅުތަކެއް ކަމަށެވެ.
މިނިސްޓަރު ވިދާޅުވި ގޮތުގައި، ޝީޝާ ފަދަ ދުންފަތުގެ ބާވަތްތައް މަނާކުރުމާއި ހަކުރު ބޭނުންކުރާ މިންވަރު މަދުކުރުމަކީ އާންމުންގެ ދިރިއުޅުމުގެ ވައްޓަފާޅިއާ ސީދާ ގުޅިފައިވާ ކަންކަމެވެ. އެހެންކަމުން، މިކަންކަން ހަރުދަނާ އުސޫލެއްގެ ތެރެއިން ރެގިއުލޭޓް ކުރުމުގެ މަސައްކަތް މިހާރު ކުރިއަށްދާ ކަމަށާއި، މި ބަދަލުތައް ގެންނާނީ އެންމެ އެކަށީގެންވާ ދަނޑިވަޅުގައި އާންމުން ހޭލުންތެރިކުރުވުމަށް ފަހު ކަމަށްވެސް އޭނާ ފާހަގަކުރެއްވި އެވެ.
އާންމު ސިއްހަތު ރައްކާތެރިކުރުމަށް މި ސަރުކާރުން އަޅަމުންދާ ފިޔަވަޅުތަކަށް އަލިއަޅުއްވާލައްވަމުން މިނިސްޓަރު ވަނީ، ދާދިފަހުން ވޭޕްގެ ބާވަތްތައް މަނާކުރުމަށާއި ދުންފަތާ ދެކޮޅަށް ނިންމި ނިންމުންތައް ފާހަގަކުރައްވާފަ އެވެ. “ޕަބްލިކް ހެލްތުގެ ވިސްނުމުގައި ފިޔަވަޅަކަށްފަހު ފިޔަވަޅެއް ކުރިއަށްދާ ނަމަ، ރާއްޖޭގައި ހަކުރު ބޭނުންކުރާ މިންވަރު އިތުރުވުމުގެ މައްސަލައަށް ވެސް އެދެވޭ ހައްލެއް އަންނާނެ،” ހެލްތު މިނިސްޓަރު ވިދާޅުވި އެވެ.
މި ބަދަލުތައް ތަންފީޒުކުރުމަކީ ހަމައެކަނި ހެލްތު މިނިސްޓްރީއަށް އެކަނި ނިންމޭނެ ކަމެއް ނޫން ނަމަވެސް، ސިއްހީ ދާއިރާ އޮތީ މިފަދަ ހަރުދަނާ ފިޔަވަޅުތައް އަމަލީ ގޮތުން ތަންފީޒުކުރެވޭނެ ދުވަހެއްގެ އިންތިޒާރުގައި ކަމަށްވެސް މިނިސްޓަރު ވިދާޅުވި އެވެ. ސަރުކާރުގެ އަމާޒަކީ ދިވެހި މުޖުތަމައަކީ ސިއްހީ ގޮތުން ދުޅަހެޔޮ ބަޔަކަށް ހެދުމެވެ.
