އެމެރިކާގެ މަނަވަރު އަބްރަހަމް ލިންކަންއަށް ޙަމަލާދީފި ކަމަށް އީރާނުން ބުނެފިއެވެ.
އޮމާންގެ އައްސޭރިފަށުގެ ފަރުބަދަތަކުގެ ނިވަލުގައި، ބޮނދައިގެން އޮތް އެމެރިކާގެ މަތިންދާބޯޓު އުފުލާ މަނަވަރުގެ ސެޓެލައިޓް އަދި ޖީ.ޕީ.އެސް ޑޭޓާތައް، އީރާނުގެ އިންޤިލާބީ ގާޑުން ދިޔައީ ޒީރޯ ކުރަމުންނެވެ.
އެއަށްފަހު، ހަތަރު ބެލިސްޓިކް މިސައިލް ޔޫ.އެސް.އެސް އަބްރަހަމް ލިންކަންއަށް އަމާޒުކޮށް ފޮނުވާލިއެވެ. އީރާނުން ބުނާ ގޮތުގައި މިއީ އަދި ހަމައެކަނި ފެށުމެކެވެ.
އޭގެފަހަތުން ހައިޕަރސޮނިކް މިސައިލްތައް ފޮނުވައިލާނީ އެއްވެސް ޙަމަލާއެއް ދިފާޢު ނުކުރެވޭނޭ ދަނޑިވަޅު ބަލާފައެވެ.
މިކަން ކަށަވަރުވެއްޖެނަމަ، މިއީ އީރާނާއި، އެމެރިކާއާ ދެމެދު ސީދާ ހަނގުރާމަ ފެށުނު ފަހުން، އެމެރިކާގެ އެންމެ ވަރުގަދަ ކަނޑުގެ ސިފައިންގެ މަނަވަރަކަށް އަމާޒުކޮށް، އީރާނުން ދިން އެންމެ ވަރުގަދަ އެއް ޙަމަލާއެވެ. އެ ޙަމަލާ ކާމިޔާބު ވެއްޖެނަމަ، އެކަން ވެގެންދާނީ އެމެރިކާއަށް އިޢާދަ ނުކުރެވޭނޭ ވަރުގެ ބޮޑު ގެއްލުމަކަަށެވެ.
އެމެރިކާގެ މަތިންދާބޯޓު އުފުލާ މަނަވަރަކީ ހަމައެކަނި މަނަވަރެއް ނޫނެވެ. އެއީ ފެންމަތީގައި ޤާއިމުކޮށްފައިވާ ވައިގެ ދިފާޢީ މަރުކަޒެކެވެ. އެ މަނަވަރުގައި، ދިހަވަރަކަށް ފައިޓާ ޖެޓްތަކާއި، އެތައް ހާސް މުވައްޒަފުންނެއް ތިބެއެވެ.
މިވަގުތު، އެމެރިކާގެ އޮފިޝަލުންގެ ފަރާތުން އެއްވެސް ޙަމަލާއެއް އަމާޒުވިކަމެއް، އަދި މަނަވަރަށް ލިބުނު އެއްވެސް ގެއްލުމެއްގެ މަޢުލޫމާތެއް ހާމަކޮށްފައި ނުވެއެވެ.
އީރާނުގެ އިސްލާމީ އިންޤިލާބީ ގާޑުން ބުނާގޮތުގައި، “ދުޝްމަނުންގެ ވަރުބަލިވެފައިވާ އަސްކަރިއްޔާއާ ދެކޮޅަށް އީރާނުގެ ހަތިޔާރު އެޅި ސިފައިން ދެމުންދާ ބާރުގަދަ ޙަމަލާތަކުގެ އާ މަރުހަލާއެއް މިވަނީ ފެށިފައެވެ. ބިމާއި، ކަނޑު ވެގެންދާނީ ޢުދުވާނީ ނިރުބަވެރިންގެ ގަބުރުސްތާނަކަށެވެ.”
މެދުއިރުމަތީގައި ހިނގަމުންދާ ހަމަނުޖެހުންތައް މިހާރު މިވަނީ އައު ހަރުފަތަކަށް ވާޞިލުވެފައެވެ.
